Jaaliyadda reer Bristol ee dalka Ingiriiska ayaa kulan soo dhaweyn iyo is-xogwaraysi ah u qabatay Wasiirka Wasaaradda Ganacsiga iyo Dalxiiska Jamhuuriyadda Somaliland, Mudane Cabdiraxmaan Xasan Nuur, oo muddooyinkii u dambeeyey safar shaqo ku joogay dalka Ingiriiska.

Kulanka ayaa waxa Wasiirka ku wehelinayey Xildhibaan Maxamed Xasan oo ka tirsan Golaha Wakiillada Somaliland, waxaana diiradda lagu saaray soo dhaweynta Wasiirka, doorka jaaliyaddu ku leedahay horumarka dalka, iyo xoojinta midnimada iyo wadajirka bulshada Somaliland.

Wasiirka oo Ka Warbixiyey Xaaladda Dalka

Wasiirka Ganacsiga iyo Dalxiiska ayaa jaaliyadda uga warbixiyey dedaallada socda iyo guulaha ay Somaliland ka gaadhay dhinacyo kala duwan, isaga oo si gaar ah uga hadlay arrimaha la xidhiidha xidhiidhada caalamiga ah iyo horumarka dalka.

Waxa uu ku boorriyey xubnaha jaaliyadda inay sii xoojiyaan midnimada, wadajirka iyo taageerada ay u hayaan dalkooda, isagoo xusay muhiimadda ay leedahay in shacabka Somaliland meel kasta oo ay joogaan ka shaqeeyaan danaha qaranka.

Bogaadin loo Jeediyey Jaaliyadda

Wasiirku waxa uu ku ammaanay jaaliyadda reer Bristol kaalinta ay ka qaataan taageerada iyo horumarinta Somaliland, isaga oo ku dhiirrigeliyey inay sii xoojiyaan doorkooda ku aaddan maalgashiga, isku xidhka qurbajoogta iyo kor u qaadista horumarka dalka.

Waxa uu sidoo kale tilmaamay in qurbajoogtu door muhiim ah ka qaataan koboca dhaqaalaha, maalgashiga iyo gudbinta sawirka Somaliland ee caalamka.

Jaaliyadda oo Ballanqaaday Taageero Dheeraad ah

Dhankooda, xubnaha jaaliyadda reer Bristol ayaa Wasiirka si diirran u soo dhaweeyey, iyaga oo muujiyey sida ay uga go’an tahay inay sii xoojiyaan kaalinta ay ku leeyihiin horumarka Somaliland.

Waxay sheegeen inay diyaar u yihiin inay door muuqda ka qaataan dhinacyada maalgashiga, isku xidhka qurbajoogta iyo taageeridda dedaallada horumarineed ee dalka.

Kulanka ayaa kusoo dhammaaday is-afgarad ku saabsan muhiimadda wadajirka, iskaashiga iyo ka qaybqaadashada qurbajoogta ee horumarka iyo mustaqbalka Somaliland.