Agaasimaha Guud ee Hay’adda Caafimaadka Adduunka (WHO), Dr. Tedros Adhanom Ghebreyesus, ayaa booqasho ku tegay magaalada Bunia ee gobolka Ituri ee bariga Jamhuuriyadda Dimuqraadiga ah ee Congo (DRC), halkaas oo uu ka socdo dillaac xooggan oo cudurka Ebola ah.

Intii uu ku sugnaa gobolka, Dr. Tedros ayaa bulshada deegaanka ku dhiirrigeliyey inay si firfircoon uga qayb qaataan dadaallada lagu xakamaynayo cudurka, isaga oo xusay in dadka deegaanku door muhiim ah ku leeyihiin fahamka caqabadaha jira iyo ka qayb qaadashada xalalkooda.

Sida ay baahisay Al Jazeera, Madaxa WHO ayaa carrabka ku adkeeyey in iskaashiga bulshada iyo hay’adaha caafimaadku uu muhiim u yahay xakameynta faafitaanka cudurka.

Koror Degdeg ah oo Ku Yimid Kiisaska Ebola

Wararka caafimaadka ayaa muujinaya in tirada kiisaska la xaqiijiyey ee Ebola ay si weyn kor ugu kacday maalmo gudahood, iyadoo gaadhay 225 kiis, marka loo eego 121 kiis oo la diiwaangeliyey laba maalmood ka hor.

Khubarada caafimaadka ayaa sheegaya in cudurkan uu ka dhashay nooca Bundibugyo ee Ebola, oo ah nooc dhif ah oo aan weli loo helin tallaal ama daawo si rasmi ah loo ansixiyey, taas oo sii kordhinaysa walaaca laga qabo faafitaankiisa.

WHO iyo MSF oo Ka Digay Xaaladda

Hay’adda WHO ayaa xaaladdan ku tilmaantay xaalad caafimaad oo degdeg ah oo u baahan feejignaan heer caalami ah.

Sidoo kale, ururka Dhakhaatiirta Aan Xuduudda Lahayn (MSF) ayaa sheegay in dillaacani ka mid yahay kuwii ugu xawaaraha badnaa ee Ebola lagu arko sannadihii u dambeeyey.

Wararka ayaa sidoo kale tilmaamaya inay jiraan in ka badan 1,000 kiis oo la tuhunsan yahay iyo boqolaal dhimasho oo lala xidhiidhinayo cudurka.

Ebola oo Gaadhay Uganda

Cudurka Ebola ayaa la sheegay inuu ka gudbay xuduudaha Congo, isagoo gaadhay dalka Uganda, halkaas oo laga xaqiijiyey dhowr kiis iyo dhimasho la xidhiidha fayraska.

Arrintan ayaa keentay in dalalka gobolka ay xoojiyaan tallaabooyinka ka hortagga cudurka, oo ay ku jiraan dabagalka dadka laga shakisan yahay, xoojinta baadhitaannada caafimaadka iyo kordhinta wacyigelinta bulshada.

Walaac Ku Saabsan Maalgelinta

Inkasta oo taageero dhaqaale iyo mid caafimaad ay ka imanayaan beesha caalamka, haddana waxaa jira walaac ku saabsan hoos u dhaca maalgelinta loo qoondeeyey la dagaallanka cudurka Ebola.

Hay’adda WHO ayaa weli rajo ka muujisay in Congo ay awood u leedahay inay xakamayso dillaacan, balse waxay ku adkaysatay in guusha lagu gaadhi karo oo keliya iskaashi dhow oo dhex mara bulshada, dowladda iyo hay’adaha caafimaadka ee caalamiga ah.