Dowladda Masar ayaa mar kale muujisay walaac xooggan oo ku saabsan dadaallada Itoobiya ay ugu jirto helitaanka marin toos ah oo ay ka hesho Badda Cas, iyadoo sheegtay in arrintaasi ay saameyn ku yeelan karto isu dheelitirka amni iyo siyaasadeed ee gobolka.

Masar ayaa caddeysay in amniga, maamulka iyo istiraatiijiyadda Badda Cas ay tahay arrin si gaar ah ugu kooban dalalka leh xeebaha baddaasi, iyadoo ka digtay in dal aan lahayn xeeb toos ah uu saameyn ama door ku yeesho maamulka marin-biyoodkaasi muhiimka ah.

Dhanka kale, Itoobiya ayaa sii waddo dadaalladeeda ku aaddan helitaanka marin badeed, iyadoo Addis Ababa ku tilmaantay arrintaasi mid muhiim u ah koboca dhaqaalaha, ganacsiga iyo mustaqbalka istiraatiijiga ah ee dalka.

Khilaafkan siyaasadeed ayaa sii kordhinaya tartanka iyo loollanka ka taagan Geeska Afrika iyo gobolka Badda Cas, xilli dalal badan oo gobolka iyo caalamkuba si dhow ula socdaan dhaq-dhaqaaqyada la xiriira marin-biyoodka istiraatiijiga ah.