Wasaaradda Arrimaha Dibadda ee Somaliland ayaa Dimitrios Tourikis u magacowday inuu noqdo Ergayga gaarka ah ee Somaliland u qaabilsanaan doona dalka Greece, iyadoo lagu wado inuu ka shaqeeyo xoojinta xiriirka siyaasadeed, dhaqaale iyo iskaashiga labada dhinac.

Dimitrios Tourikis oo ah diblumaasi khibrad u leh arrimaha dhaqaalaha iyo siyaasadda ayaa loo xushay doorkan cusub si uu u hormariyo xidhiidhka Somaliland iyo Giriigga, xilli ay Somaliland dadaal ugu jirto ballaarinta xiriirrada caalamiga ah iyo soo jiidashada taageerada dibadda.

Magacaabistan ayaa kusoo aadeysa kadib kulan uu Madaxweyne Cabdiraxmaan Maxamed Cabdillaahi Cirro dhawaan kula yeeshay dalka Switzerland ganacsato u dhalatay Giriigga, intii uu ka qeyb galayay shirkii dhaqaalaha adduunka ee Davos. Kulankaas ayaa lagu sheegay mid diiradda lagu saaray maalgashi iyo iskaashi dhaqaale oo dhexmara Somaliland iyo Giriigga.