Mararka qaar qofku wuxuu ilaabaa qiimaha nimcooyinka uu haysto, sababtoo ah wuxuu aad ugu mashquulaa waxa ka maqan. Laakiin xaqiiqadu waxay tahay in meel ka mid ah dunida uu joogo qof ku riyoonaya inuu haysto nolosha aad maanta ku nooshahay.

Waxaad haysataa waxyaabo ay dad badan u arkaan riyo:

caafimaad, nabad, qoys, hurdo deggan, socod xor ah, ama nolol caadi ah oo aanad adigu qiime gaar ah siin.

Nimcooyinka Aan La Dareemin

Marka aad habeenkii si nabad ah u seexato, waxaa jira qof xanuun iyo walbahaar la ildaran oo ku baryaya Alle inuu helo hal habeen oo nasasho ah.

Marka aad si xor ah u socoto, waxaa jira qof aan awoodin inuu istaago, oo ku taamaya inuu mar uun lugihiisa ku socdo sidaada oo kale.

Waxaa jira:

qof aan carruur haysan,

qof aan helin nolol uu ku qanacsan yahay,

iyo kuwo badan oo u arka waxa aad haysato riyo aan sahlanayn in la gaadho.

Ha Isbarbar Dhigin Dadka Kale

Qof kasta imtixaan ayuu leeyahay, laakiin sidoo kale qof kastaa wuxuu dhex joogaa nimcooyin badan oo aanu mararka qaar dareensanayn.

Noloshaada ha ku cabbirin waxa dadka kale haystaan, balse eeg waxa adiga lagu siiyay:

caafimaadkaaga, qoyskaaga, iimaankaaga, iyo fursadaha aad haysato.

Wax kasta oo aad maanta haysato, waxaa jira qof kale oo si dhab ah ugu hamminaya.

Mahadnaq Waa Furaha Farxadda

Farxaddu mar walba kuma jirto inaad hesho wax cusub, balse waxay ku jirtaa inaad ogaato qiimaha waxa aad hore u haysatay.

Mahadnaqa Eebbe wuxuu qalbiga ku abuuraa:

degganaan,

qanacsanaan,

iyo farxad dhab ah.

Haddaba, mar kasta xusuusnow:

Waxaad tahay riyo uu qof kale ku taamayo.

️ W/Q: Usame Qiyasle