Guddoomiyaha gobolka Togdheer, Maxamuud Cali Saleebaan (Ramaax), ayaa sheegay in kiisaska ugu badan ee soo gaadha hay’adaha sida Booliska, Maxkamadaha, Guddiga Nabadgelyada iyo Dowladda Hoose ay yihiin muranno la xidhiidha dhul si sharci-darro ah loo iibiyey.

Guddoomiyaha ayaa hadalkan ka jeediyey kulan uu la yeeshay madaxda nootaayooyinka gobolka Togdheer, isaga oo xusay in marar badan ay dhacdo in qof aan lahayn dhul uu sameysto waraaqo been abuur ah oo lagu iibinayo dhul aanu sharci u haysan.

Wuxuu ku adkeeyey nootaayooyinka inay si adag u hubiyaan dukumentiyada iyo sharciyadda dhulka la iibinayo, si looga hortago khilaafaadka iyo murannada ka dhasha lahaanshiyaha.

Guddoomiye Ramaax ayaa yidhi: "Kiisaska ugu badan ee gobolka yaalla waxa weeye lahaanshiyo aan sharci ahayn oo nin nootaayo soo maray yidhi waxaan iibiyey dhulkan isaga oo aan mulkiyad iyo sharci midna u haysan.”

Ugu dambayn, wuxuu ugu baaqay nootaayooyinka inay qof kasta ka hubiyaan sharciyadda dhulka uu iibinayo, si loo ilaaliyo xuquuqda shacabka loogana hortago murannada dhulka.