Agaasimaha Guud ee Wasaaradda Horumarinta Biyaha Somaliland ayaa kulan shaqo oo muhiim ah la yeeshay masuuliyiin ka socday Concern Worldwide, kuwaas oo uu hoggaaminayay Maamulaha Guud ee xafiiska Somaliland, Mr. Kenneth.

Kulanka ayaa ku bilaabmay mahadcelin ay hay’addu u jeedisay Agaasimaha Guud, iyagoo ku bogaadiyay wada shaqayntii wanaagsanayd ee ay hore u lahaayeen, gaar ahaan xilligii uu ka tirsanaa Wasaaradda Shaqada, Arrimaha Bulshada iyo Qoyska.

Intii uu kulanku socday, hay’addu waxay sidoo kale Agaasimaha ku maamuustay shahaado sharaf, taas oo muujinaysa qadarin iyo aqoonsi ku aaddan kaalintii uu ka qaatay horumarinta adeegyada bulshada.

Masuuliyiinta Concern Worldwide ayaa warbixin ka bixiyay mashaariicda ay ka wadaan Wasaaradda Horumarinta Biyaha, gaar ahaan dhinacyada la xidhiidha biyo helidda, fayadhowrka iyo nadaafadda (WASH).

Ugu dambayn, Agaasimaha Guud ayaa muujiyey sida ay Wasaaraddu uga go’an tahay xoojinta wada shaqaynta hay’adda, isagoo ballan qaaday in si wadajir ah looga shaqayn doono sidii bulshada loogu heli lahaa biyo nadiif ah loona horumarin lahaa adeegyada fayadhowrka iyo nadaafadda dalka.