Wasiiru-dawlaha Wasaaradda Arrimaha Gudaha iyo Amniga Somaliland, Mudane Cabdirashiid Maxamed Axmed (Magaalo), oo uu weheliyo Xoghayaha Fulinta Gobolka Sanaag, ayaa maanta si rasmi ah ula wareegay laba gaadhi oo muddo ku xayirnaa deegaanka Degmada Goof.

Gaadiidkan ayaa waxaa ku wareejiyay odayaasha iyo masuuliyiinta degmada, kuwaas oo muujiyay kaalintooda ku aaddan ilaalinta hantida shacabka iyo xoojinta wada shaqaynta amniga.

Wasiiru-dawlaha ayaa gaadiidkaasi ku wareejiyay Boqor Siciid Aganje, oo wakiil uga ahaa ganacsatadii lahayd gaadiidka, si loo hubiyo in hantidii dib loogu celiyo mulkiilayaasheedii saxda ahaa.

Wasaaradda Arrimaha Gudaha iyo Amniga ayaa bogaadisay doorka wax ku oolka ah ee ay ka qaateen odayaasha, masuuliyiinta iyo bulshada deegaanka, iyagoo muujiyay masuuliyad, wadajir iyo ilaalinta sharciga.

Ugu dambayn, Wasaaraddu waxay adkaysay muhiimadda ay leedahay iskaashiga bulshada iyo hay’adaha amniga, si loo sugo nabadgelyo waarta iyo xasilooni guud.