Xoghayaha Dawladda Hoose ee Hargeysa, Mukhtaar Boosh Cadde, ayaa sheegay in si guul leh loo hirgeliyey balan-qaadkii Madaxweynaha ee dhismaha jidka isku xidha Bali-gubadle iyo Hargeysa.

Xoghayaha ayaa xusay in jidkan markii hore ay dhibaatooyin badan ka jireen, gaar ahaan xilliyada roobka oo aan la mari karin, balse hadda uu fududayn doono isku socodka dadka iyo gaadiidka, isla markaana kor u qaadi doono ganacsiga labada dhinac.

Wuxuu sheegay: "Halkan marka roobku da’o lama mari jirin culayskeeda iyo dhibbaatada laga la kulmi jiray, waxa aan ku faraxsanahay in balanqaadkaa wadada ee Madaxweynuhu hirgalay, sidoo kale ambulance-kii la soo wareejiyeyna uu hirgalay.”

Mukhtaar Boosh Cadde ayaa sidoo kale ballan-qaaday in Dawladda Hoose ee Hargeysa ay doorkeeda ka qaadan doonto dhammaystirka jidka marka uu soo gaadho gudaha magaalada Hargeysa, isaga oo tilmaamay inay qaybtooda ka shaqayn doonaan haddii Alle idmo.