Wasiirka Wasaaradda Gaadiidka iyo Horumarinta Jidadka Somaliland, Mudane Cismaan Ibraahin Nuur (Af-Gaab), ayaa sheegay in wasaaraddu ay si buuxda garab u taagan tahay hoggaanka cusub ee ururka gaadiidleyda Tawfiiq ee maanta lagu doortay magaalada Berbera.

Wasiirka ayaa dardaaran u jeediyay hoggaanka cusub ee loo doortay inay hoggaamiyaan ururka labada sanno ee soo socota, isagoo ku booriyay inay xoogga saaraan horumarinta ururka iyo kor u qaadidda adeegyada gaadiidka.

Wuxuu sidoo kale carrabka ku adkeeyay in wasaaraddu diyaar u tahay inay taageerto dadaallada gaadiidleyda, isaga oo yidhi: "Wasaaradda Gaadiidku waxay idin la garab taagan tahay in ay Gaadiidleydu horumar sameeyaan.”

Wasiir Cismaan Af-Gaab ayaa hadalkan ka jeediyay munaasabad uu kaga qayb galay doorashada hoggaanka cusub ee ururka gaadiidleyda Tawfiiq oo ka dhacday magaalada Berbera.