Wasiirka Dhaqaalaha dalka Slovakia, Denisa Saková, ayaa shaacisay in shidaalka Ruushka ee u socday Slovakia dib loo bilaabayo, iyadoo la adeegsanayo dhuumaha Druzhba ee mara dalka Ukraine.

Arrintan ayaa imanaysa xilli uu sii xoogaysanayo khilaafka u dhexeeya Ukraine iyo dalalka Hungary iyo Slovakia, kadib markii bishii January la joojiyey keenista saliidda Ruushka ee dalalkan.

Si ka duwan dalal badan oo ka tirsan Midowga Yurub, Hungary iyo Slovakia ayaa weli si weyn ugu tiirsan shidaalka Ruushka si ay u daboolaan baahiyahooda tamarta, taas oo keentay in ay si adag uga falceliyaan hakadka ku yimid sahayda.

Labada dal ayaa ku eedeeyey Ukraine inay ku guuldareysatay hagaajinta dhuumaha burburay, halka Hungary ay xannibtay amaah weyn oo Midowga Yurub siin lahaa Ukraine, iyadoo Slovakia-na ay diidday cunaqabateyn cusub oo ka dhan ah Ruushka.

Xiisaddan ayaa muujinaysa kala qaybsanaanta ka dhex jirta Midowga Yurub ee ku saabsan arrimaha tamarta iyo xiriirka Ruushka, iyadoo saameyn ku yeelan karta mustaqbalka siyaasadda iyo dhaqaalaha gobolka.