Wariye caan ah oo rug-caddaa ah, Nimco Samriye, ayaa la filayaa inay maalinta berri ah soo gaadho magaalada Jigjiga ee Deegaanka Soomaalida, halkaas oo loogu diyaariyey soo dhawayn ballaadhan oo ay ka qayb geli doonaan dhalinyaro iyo qeybaha kala duwan ee bulshada.

Nimco Samriye ayaa hore safarro ugu kala bixisay magaalooyin kala duwan, iyadoo magaalada Hargeysa ku qabatay kulamo si weyn loo soo dhaweeyey, kuwaas oo ay kaga qayb qaateen dhalinyaro, hal-abuurro iyo fannaaniin caan ah.

Waxaa ka mid ahaa dadkii ay la kulantay Qoraa Aisha Yar, oo ay u qabatay bandhig gaar ah, iyo fannaanada Prince Istaahil, oo si weyn uga qayb qaatay munaasibadahaasi.

Wariyahan ayaa lagu tilmaamaa qof si gaar ah u taageerta dhalinyarada, isla markaana siisa fursado iyo tixgelin sare, taas oo sababtay in ay sumcad weyn ku dhex yeelato bulshada.

Soo dhawaynta Jigjiga ayaa la qorsheeyey inay dhacdo berri saacadda 10:00 subaxnimo, waxaana lagu qaban doonaa Green Hotel, iyadoo bulshada lagu boorriyey inay si meeqaam leh u soo dhaweeyaan.

Dhacdadan ayaa la filayaa inay noqoto mid si weyn loo hadal hayo, iyadoo dhalinyarada deegaanka ay u arkaan fursad muhiim ah oo ay kula kulmaan wariye sumcad leh.