Lacagaha dalal ka tirsan qaaradda Afrika ayaa muujiyey korodh la yaab leh sanadkii la soo dhaafay, iyagoo si weyn uga xoog roonaaday doolarka Maraykanka, sida ay warisay Business Insider Africa.

Lacagta rand-ka ee dalka Koonfur Afrika ayaa si gaar ah uga dhex muuqatay, iyadoo sare u kacday 16.4%, kuna jirta kaalinta saddexaad ee lacagaha ugu waxqabadka fiican caalamka. Sidoo kale, naira-da Nigeria ayaa korodhay 13.5%, taasoo u sahashay inay gasho kaalinta toddobaad ee liiskaas.

Khubarada dhaqaalaha ayaa arrintan ku sababeeyey horumarka gudaha ee dalalkan, dib-u-habeynta dhaqaale iyo korodhka qiimaha macdanta, kuwaas oo si weyn u xoojiyey qiimaha rand-ka. Dhanka kale, isbeddellada ku yimid socodka maalgelinta caalamiga ah iyo hagaajinta aasaaska dhaqaale ayaa iyaguna door ka qaatay koboca lacagaha qaaradda.

Isbeddelladan ayaa muujinaya ifafaalo cusub oo ka soo baxaya suuqyada dhaqaalaha caalamka, gaar ahaan kuwa soo koraya, kuwaas oo sii muujinaya awood iyo tartan sii kordhaya.

Ugu dambayn, korodhkan ayaa fursad u noqon kara dalalka Afrika si ay u xoojiyaan dhaqaalahooda, una kordhiyaan kalsoonida maalgashadayaasha caalamiga ah.