Wasiir ku-xigeenka Wasaaradda Warfaafinta, Dhaqanka iyo Wacyigelinta Jamhuuriyadda Somaliland (JSL) ayaa si rasmi ah u magacaabay guddi gaar ah oo loo xilsaaray qabanqaabada iyo isku-dubbaridka munaasabadda xil-wareejinta wasaaradda.

Guddidan cusub ayaa ka kooban Agaasimaha Guud ee wasaaradda iyo qaar ka mid ah Agaasime waaxeedyada, kuwaas oo si wadajir ah u diyaarin doona habsami u socodka munaasabadda xil-wareejinta.

Ujeeddada guddidan ayaa ah inay hubiyaan in munaasabadda xil-wareejintu u dhacdo si nidaamsan, sharaf leh, isla markaana ka turjumaysa muhiimadda wasaaradda ee dhinacyada warfaafinta, dhaqanka iyo wacyigelinta bulshada.

Munaasabaddan ayaa la filayaa inay si rasmi ah ugu wareejiso xilka wasiirka cusub ee Wasaaradda Warfaafinta, Barkha Batuun, taas oo ka mid ah isbeddellada cusub ee xukuumaddu samaysay.

Magacaabista guddidan ayaa muujinaysa sida ay wasaaraddu uga go’an tahay in si habsami leh loo maareeyo xil-wareejinta, iyadoo la ilaalinayo nidaamka iyo kala dambeynta hawlaha dowladda.