Wasiirka Wasaaradda Waxbarashada Jamhuuriyadda Somaliland (JSL), Prof. Ismaaciil Ducaale Yuusuf, ayaa kulan shaqo kula yeeshay xarunta wasaaradda ee magaalada Burco shaqaalaha iyo masuuliyiinta heer gobol, si uu u qiimeeyo habsami u socodka shaqada iyo horumarinta adeegyada waxbarasho.

Kulankan ayaa qayb ka ahaa kormeer uu wasiirku ku eegayay xaaladda waxbarashada ee gobolka, iyadoo sidoo kale diiradda la saaray sidii loo dardargelin lahaa adeegyada ay wasaaraddu bixiso.

Masuuliyiinta iyo shaqaalaha xarunta ayaa wasiirka si diirran u soo dhaweeyay, iyagoo warbixin faahfaahsan ka siiyay xaaladda guud ee waxbarashada, hawlaha socda iyo caqabadaha jira. Waxay sidoo kale muujiyeen dadaalkooda ku aaddan horumarinta waxbarashada iyo adeegyada ay bulshada u hayaan.

Dhankiisa, Wasiir Prof. Ismaaciil Ducaale Yuusuf ayaa ku ammaanay shaqaalaha hawsha adag ee ay u hayaan bulshada, isagoo tilmaamay in shaqadoodu ay laf-dhabar u tahay horumarka dalka iyo mustaqbalka jiilasha soo koraya.

Wasiirka ayaa sidoo kale ballan qaaday in wasaaraddu ay ka shaqayn doonto xallinta caqabadaha jira, isla markaana ay taageero buuxda siin doonto shaqaalaha si ay si hufan ugu gutaan waajibaadkooda.

Kulankan ayaa loo arkaa mid muhiim u ah xoojinta wada-shaqaynta iyo horumarinta nidaamka waxbarasho ee gobolka, iyadoo la rajaynayo natiijooyin wax ku ool ah oo ka soo baxa dadaallada socda.