Sida ay warisay Semafor, dowladda Sacuudiga ayaa lagu soo warramayaa inay bilowday daad-gureynta kumannaan shaqaale ah oo ka shaqeeya aagga ganacsiga ee magaalada Riyadh, gaar ahaan xarunta KADF (King Abdullah Financial District), oo ah xarunta ugu weyn ee maaliyadda dalka.

Wararku waxay sheegayaan in tallaabadan ay la xiriirto cabsi laga qabo weerarro suurtagal ah oo uga yimaada Iran, kuwaas oo isugu jiri kara gantaallo iyo diyaaradaha aan duuliyaha lahayn (drones), iyadoo xiisadaha gobolka ay sii kordhayaan.

Xarunta KADF ayaa loo arkaa laf-dhabarta dhaqaalaha Sacuudiga, maadaama ay ku yaallaan bangiyada waaweyn, xarumaha maaliyadeed iyo shirkado caalami ah oo door weyn ku leh dhaqdhaqaaqa dhaqaale ee dalka iyo gobolka.

Daad-gureyntan ayaa muujinaysa heerka feejignaanta ee ay dowladda Sacuudigu qaadday, iyadoo la doonayo in la ilaaliyo badbaadada shaqaalaha iyo hantida ku sugan goobaha muhiimka ah.

Inkasta oo aan weli si rasmi ah loo xaqiijin khatarta weerar, haddana tallaabadan ayaa loo arkaa mid ka tarjumaysa sida ay dowladda Sacuudigu uga hortagayso khataraha amni ee iman kara, iyadoo la xoojinayo ilaalinta xarumaha istiraatiijiga ah ee dalka.