Machadka cilmi-baadhista ee FMES-France (Fondation Méditerranéenne d'Études Stratégiques) ayaa sheegay in aqoonsiga ay Israel siisay Somaliland uu yahay tallaabo istiraatiiji ah oo kor u qaadaysa mustaqbalka siyaasadeed, dhaqaale, amni iyo ganacsi ee gobolka.

Warbixintu waxay tilmaamaysaa in arrintani ay Somaliland siinayso fursad cusub oo ay ku ballaadhiso xidhiidhadeeda caalamiga ah, isla markaana ay kaga qayb gasho fagaarayaasha siyaasadeed ee dunida, si ay u muujiso muhiimaddeeda istiraatiijiga ah.

Fursado Diblomaasiyadeed iyo Iskaashi Caalami ah

Warbixinta FMES-France, oo uu soo turjumay Wargeyska Dawan, ayaa sidoo kale xustay in Israel—oo leh saameyn diblomaasiyadeed iyo mid amni oo caalami ah—ay Somaliland u furayso albaabyo cusub oo dhinaca xidhiidhada caalamiga ah ah.

Tani waxay Somaliland u sahleysaa:

Inay ballaadhiso iskaashiga diblomaasiyadeed

Inay ka qayb gasho madalaha siyaasadeed ee caalamka

Inay si toos ah u soo bandhigto doorkeeda istiraatiijiga ah

Muhiimadda Juqraafiyeed ee Somaliland

FMES-France waxay si gaar ah u iftiimisay muhiimadda juqraafiyeed ee Somaliland, iyada oo leh xeeb dheer oo ku taalla Gacanka Cadmeed, taas oo ka dhigaysa meel muhiim u ah ganacsiga iyo amniga Badda Cas.

Warbixintu waxay xustay in aqoonsiga Israel uu kordhinayo qiimaha:

Dekedda Berbera

Kaabayaasha dhaqaalaha dalka

Iyadoo ay jiraan maalgashi hore oo ka yimid Imaaraadka Carabta (UAE) iyo xiisaha Itoobiya ee helitaanka marin badeed.

Arrintani waxay Somaliland siinaysaa fursado waaweyn oo dhinaca:

Koboca dhaqaalaha

Iskaashiga diblomaasiyadeed

Doorka ganacsiga gobolka

Xasillooni iyo Fursad Siyaasadeed

Warbixintu waxay sidoo kale tilmaamaysaa in Somaliland ay ka faa’iidaysanayso xasilloonideeda siyaasadeed iyo nidaamkeeda dimuqraadiga ah, si ay u hesho dabacsanaan siyaasadeed oo u oggolaanaysa inay samayso heshiisyo istiraatiiji ah.

Tani waxay Somaliland ka dhigaysaa meel ay quwadaha caalamku ka heli karaan:

Iskaashi amni

Lamaane lagu kalsoonaan karo

Fursado istiraatiiji ah

Saameyn Ka Baxsan Aqoonsiga Sharciyeed

Warbixintu waxay adkaynaysaa in saameynta dhabta ah ee Somaliland aysan ku xidhneyn aqoonsi sharciyeed oo keliya, balse ay ku salaysan tahay awoodda ay u leedahay inay kasbato saaxiibo istiraatiiji ah oo caalami ah.

"Saameynta dhabta ah ee Somaliland maaha mid ku xidhan aqoonsi sharci oo keliya, balse waa awoodda ay u leedahay inay kasbato saaxiibo istiraatiiji ah oo caalami ah,” ayaa lagu sheegay warbixinta.

Mustaqbal Ifaya

Warbixinta FMES-France waxay ku soo gabagabaysay in xitaa haddii aqoonsiyo kale aanay si degdeg ah u iman, Somaliland ay sii ahaan doonto ciyaaryahan muhiim ah oo ka dhex muuqda tartanka Geeska Afrika.

Waxa kale oo ay tilmaantay in mustaqbalka dhow ee Somaliland uu u muuqdo mid ifaya, iyadoo fursadaha diblomaasiyadeed ee jira ay suuragelinayaan:

Xoojinta iskaashiga amni

Kobcinta xidhiidhada dhaqaale

Ballaadhinta saamaynta caalamiga ah