Afhayeenka Madaxweynaha Jamhuuriyadda Somaliland, Xuseen Aadan Cige (Deyr), ayaa si milgo leh ugu mahadnaqay Xildhibaan John W. Rose iyo mudanayaasha kale ee Congress-ka Maraykanka, kuwaas oo soo bandhigay hindise-sharciyeedka H.R. 7993 ee ku saabsan helitaanka dhaqaalaha iyo fursadaha Somaliland.

Afhayeenku waxa uu sheegay in muddo ku dhow 35 sano Somaliland si caddaalad-darro ah looga reebay nidaamyada maaliyadeed ee caalamiga ah, inkasta oo ay tahay dal leh xasilooni, dawlad shaqaynaysa iyo nidaam dimuqraadi ah, isla markaana leh muhiimad istiraatiiji ah.

Qoraal uu ku baahiyay barta X (Twitter) oo ay soo xigatay SOLNA, ayuu ku tilmaamay hindise-sharciyeedkan isbeddel weyn oo taariikhi ah, maadaama uu Somaliland u furayo waddooyin ay ku gaadho:

Bangiyada caalamiga ah

Soo jiidashada maalgashiga

Ka qaybgalka buuxa ee dhaqaalaha adduunka

Sidoo kale, Afhayeenku waxa uu xusay in tallaabadani ay fariin cad u dirayso beesha caalamka, taas oo muujinaysa in Somaliland aan mar dambe la iska indho-tiri karin.

Waxa uu intaas ku daray in arrintani aanay ku koobnayn oo keliya dhinaca dhaqaalaha, balse ay tahay tallaabo istiraatiiji ah oo Somaliland u sii dhaweynaysa kaalinteeda saxda ah ee ay ku leedahay caalamka.

Ugu dambayn, Xuseen Deyr ayaa hoosta ka xarriiqay in hindise-sharciyeedkani muujinayo isbeddel muuqda oo ku saabsan fahamka iyo aqoonsiga Somaliland, isla markaana caddeynaya in dalka uu xaq u leeyahay inuu ka mid noqdo nidaamka maaliyadeed ee caalamiga ah.