Warbaahin caalami ah ayaa shaaca ka qaaday in ay jiraan shan dal oo la filayo inay si dhow u qaadaan tallaabooyin ku wajahan aqoonsiga Jamhuuriyadda Somaliland, arrin si weyn u soo jiidatay indhaha siyaasadda caalamka.

Warbixintan ayaa tilmaamaysa in Somaliland ay ku jirto marxalad cusub oo diblomaasiyadeed, iyadoo ay socdaan wada-xaajoodo iyo xiriirro istiraatiiji ah oo ay la leedahay dalal muhiim ah.

Inkasta oo aan si rasmi ah loo shaacin magacyada dhammaan dalalkaasi, haddana warbixintu waxay xustay in qaar ka mid ah ay ka mid yihiin dalal gobolka Geeska Afrika iyo kuwa Bariga Dhexe, kuwaas oo danaynaya muhiimadda istiraatiijiga ah ee Somaliland, gaar ahaan dhinacyada ganacsiga, amniga iyo marinada badda.

Sidoo kale, warbixintu waxay tilmaamaysaa in horumarka ay Somaliland ka samaysay dhinacyada dawladnimada, dimuqraadiyadda iyo xasilloonida uu sare u qaaday rajada aqoonsi caalami ah.

Falanqeeyayaal ayaa aaminsan in haddii mid ka mid ah dalalkan uu si rasmi ah u aqoonsado Somaliland, ay taasi horseedi karto sil-silad aqoonsiyo cusub, taas oo beddeli karta jihada siyaasadeed ee gobolka.

Si kastaba ha ahaatee, weli lama hayo xaqiijin rasmi ah oo ka timid dalalka la sheegay, waxaana arrintan lagu tilmaamay mid u baahan in si dhow loola socdo horumarkeeda maalmaha soo socda.