Madaxweynaha Jamhuuriyadda Somaliland, Dr. Cabdiraxmaan Maxamed Cabdillaahi (Cirro), ayaa sheegay in ay sii kordheen cadowga Somaliland tan iyo markii ay gaadhay horumar dhinaca aqoonsiga ah.

Madaxweynaha oo kulan kula qaatay qaar ka mid ah odayaasha iyo waxgaradka magaalada Hargeysa, gaar ahaan Hotel Grand Haddi, ayaa muujiyay kalsooni buuxda oo uu ku qabo awoodda Qaranka ee difaaca naftiisa.

"Somaliland cadowgeedii waa sii boqol laabmay intii ictiraafku yimi, waxaan se maanta ku kalsoonahay in Qaranka aan difaaci karno, cid kasta oo ina soo doonatana aynu cashar u dhigi karno," ayuu yidhi Madaxweynaha JSL.

Madaxweynuhu waxa uu sidoo kale carrabka ku adkeeyay in shacabka Somaliland ay leeyihiin midnimo iyo awood difaac, taas oo ka dhigaysa inay ka hortagi karaan khatar kasta oo dibadda ah.

Kulankan ayaa qayb ka ahaa dadaallada Madaxweynaha ee lagu xoojinayo wada-tashiga iyo iskaashiga hoggaanka dhaqanka iyo bulshada, si loo ilaaliyo amniga, midnimada iyo jiritaanka qaranka Somaliland.