La-taliyaha Madaxweynaha Jamhuuriyadda Somaliland ee Arrimaha Dhaqaalaha, Cabdiraxmaan Ducaale Bayle, ayaa shaaca ka qaaday inuu bixiyay cashuurtii hantidiisa ku waajibtay sannadka 2026, isaga oo bulshada iyo ganacsatada ugu baaqay inay iyaguna si waajib ah u bixiyaan cashuuraha.

Cabdiraxmaan Ducaale Bayle ayaa carrabka ku adkeeyay in bixinta cashuuraha ay muhiim u tahay horumarinta adeegyada bulshada, isagoo xusay in lacagta cashuurta laga helo lagu fuliyo adeegyo muhiim ah sida horumarinta magaalooyinka, adeegyada bulshada, iyo bixinta mushaharka shaqaalaha dawladda.

Waxa uu sidoo kale uga mahadceliyay Dawladda Hoose ee Boorama nidaamka wanaagsan ee ay u diyaariyeen xogtiisa iyo habka casriga ah ee kaydinta faylasha iyo xogaha muwaadiniinta.

Bayle ayaa yidhi:

"Aad baan ugu faraxsanahay in aan bixiyo cashuurtii dhulkeygii aan ku lahaa Boorama. Bulshada reer Awdal iyo guud ahaan Somaliland marka ay bixiyaan cashuurta oo ay arkaan in wax loogu qabanayo, yididiilo ayaa ku dhalanaysa, markaasna dadku way sii bixinayaan cashuurta."

Waxa uu intaas ku daray in haddii dadku arki waayaan adeegyada laga fulinayo cashuurtooda ay niyad-jab ku keeni karto bulshada, balse haddii lacagta cashuurta si muuqata loogu adeego horumarinta dalka ay dadku kalsooni ku qabaan inay sii wadaan bixinta cashuuraha.

Ugu dambayn, Cabdiraxmaan Ducaale Bayle ayaa ku ammaanay shaqaalaha Dawladda Hoose ee Boorama sida ay u maamulaan hawlaha cashuuraha, gaar ahaan nidaamka xog kaydinta casriga ah iyo sida ay shaqada ugu soo kallahaan subaxnimadii hore si ay u gutaan waajibaadkooda shaqo.