Agaasimaha guud ee Wasaaradda Xannaanada Xoolaha Jamhuuriyadda Somaliland, Mudane Axmed Cismaan Jaamac, ayaa xafiiskiisa ku qaabilay mas’uuliyiin ka socotay hay’adaha Consulting Engineers Salzgitter GmbH (CES) iyo Horn AquaTech (HAT), kuwaas oo booqasho shaqo ugu yimid wasaaradda.

Kulanka ayaa diiradda lagu saaray xoojinta iskaashiga u dhexeeya wasaaradda iyo hay’adahaasi, wada-tashiga mashaariicda horumarineed ee ay ka taageeraan wasaaradda, iyo sidii loo dardargelin lahaa hawlaha lagu horumarinayo xannaanada xoolaha iyo adeegyada la xidhiidha.

Mas’uuliyiinta kulanka ka qaybgalay ayaa sidoo kale ka wada hadlay fursadaha iskaashi ee mustaqbalka, si loo sii xoojiyo mashaariicda horumarineed ee ay hay’adahani ka fuliyaan dalka, gaar ahaan kuwa la xidhiidha kobcinta wax-soo-saarka xoolaha iyo horumarinta adeegyada reer miyiga.