Wasaaradda Difaaca ee Turkiga ayaa maanta sheegtay in ciidamada NATO ay si guul leh u qabteen gantaalkii saddexaad ee galay hawada Turkiga tan iyo markii uu bilaabmay dagaalka la xidhiidha Iiraan.

War-saxaafadeed ay soo saartay wasaaraddu ayaa lagu sheegay in gantaal ballistic ah oo laga soo riday Iran uu galay hawada Turkiga, balse ay si degdeg ah uga hortageen ciidamada cirka iyo nidaamka difaaca gantaallada ee NATO ee ku sugan Bariga Mediterranean-ka. Wasaaraddu waxay sheegtay in aan wax khasaare ah ka dhalan dhacdadaas.

Dhacdadan ayaa imanaysa kadib markii Isniintii sidoo kale la qabtay gantaal kale. Madaxweynaha Turkiga Recep Tayyip Erdoğan ayaa markaas uga digay Iran inay ka fogaato tallaabo kasta oo sii hurin karta xiisadda gobolka. Dowladda Iran ayaa dhinaceeda beenisay inay gantaal u dirtay dhanka Turkiga.

Erdoğan ayaa sidoo kale sheegay in ciidamada Turkiga ay heegan buuxa ku jireen tan iyo markii uu bilaabmay dagaalku, iyadoo hawada dalka si joogto ah loo kormeerayo. Kormeerkaas waxaa lagu sameynayaa diyaaradaha dagaalka ee F-16, diyaaradaha digniinta hore (AWACS), iyo diyaaradaha shidaal ku shuba kuwa kale ee hawada sare.