Haddii aad dareento in saboolnimo kugu daba socoto, murugo iyo welwelna aysan kaa tagin, ama arrimaha noloshaadu mar walba isku dhex yaacaan oo aad la kulanto guul-darrooyin isdaba joog ah, ama aad tahay qof shaqo la’aan ah, ama aad lacag hesho balse si degdeg ah u lunto—waxaa habboon in qofku dib u eego jidka uu ku socdo.

Talo muhiim ah ayaa ah in qofku ka fogaado xumaanta iyo wax kasta oo xaaraan ah, kana dheeraado dambiyada iyo xiriirrada aan Ilaahay raalli ka ahayn. Sidoo kale waa in aan la dayacin salaadda, lagana caajisin gudashadeeda, maadaama ay tahay tiirka ugu weyn ee diinta.

Waxaa kale oo muhiim ah in laga fogaado xiriirrada iyo dhaqamada aan ku dhisnayn waxa Ilaahay raalli ka yahay, maadaama arrimahaas ay saameyn ku yeelan karaan nolosha qofka iyo barakada ku jirta risiqiisa.

Marka qofku ka dheeraado xaaraanta oo uu ku dhegganaado cibaadada, Ilaahay wuxuu u furaa albaabada barakada, risiqa iyo deganaanshaha qalbiga. Nolosha qofka waxaa ku soo kordha xasillooni iyo rajo, waxaana fududaada arrimihii hore ugu adkaa.