Xiisadda sii kordhaysa ee ka taagan Bariga Dhexe ayaa sababtay in dalal badan oo Khaliijka ka tirsan ay bilaabaan raadinta marinno cusub oo ay ku dhoofiyaan shidaalkooda, kadib markii khataro amni ay ka soo baxeen Marinka Hormuz.

Shirkadda weyn ee shidaalka Sacuudiga ee Saudi Aramco ayaa qorshaynaysa inay qayb ka mid ah dhoofinta saliiddeeda u weeciso Badda Cas, si ay uga fogaato khatarta ka jirta marinka Hormuz. Tallaabadan ayaa timid kadib markii ay sii kordheen xiisadaha u dhexeeya Iran, Maraykanka iyo Israel, kuwaas oo saameeyay maraakiibta shidaalka qaada.

Dalalka soo saara shidaalka ee Khaliijka sida Sacuudi Carabiya, Imaaraadka Carabta, Kuwait iyo Ciraaq ayaa la sheegay in ay la kulmeen caqabado ku saabsan dhoofinta saliidda, iyadoo boqolaal maraakiib ahi ay ku xayiran yihiin labada dhinac ee marinka Hormuz. Iran ayaa sidoo kale sheegtay inay bartilmaameedsan karto maraakiib kasta oo isku dayda inay ka gudbaan marin-biyoodkan istiraatiijiga ah.

Arrintan ayaa si toos ah u saamaysay suuqa caalamiga ah ee shidaalka, iyadoo qiimaha saliidda Brent crude uu kordhay ku dhowaad 12% toddobaadkan, taas oo ka dhalatay walaaca ku saabsan sahayda shidaalka iyo gaaska.

Haddii dhoofinta saliiddu sii adkaato, waddamada soo saara waxay ku qasbanaan karaan inay dhimaan wax-soo-saarkooda, maadaama haamaha kaydku si degdeg ah u buuxsamayaan. Tusaale ahaan, Ciraaq ayaa horey u dhintay wax-soo-saarkeeda ku dhowaad 1.5 milyan foosto maalintii.

Dhanka kale, Saudi Aramco waxay qorshaynaysaa in qayb ka mid ah shixnadaha saliidda Arab Light laga raro dekedda Yanbu ee ku taalla Badda Cas, halkii laga mari lahaa marinka Hormuz.

Fursad u Soo Baxaysa Dekedda Berbera

Khabiirada qaar ayaa aaminsan in Dekedda Berbera oo ka mid ah dekedaha ugu casrisan Geeska Afrika ay noqon karto meel muhiim ah oo mustaqbalka ka faa’iidaysata xaaladdan. Haddii ay xukuumadda Somaliland samayso galaangal diblomaasiyadeed iyo heshiisyo maalgashi, waxaa suuragal ah in dekeddu qayb ka qaadato gaadiidka shidaalka iyo ganacsiga tamarta ee gobolka.

Arrintani waxay noqon kartaa fursad dhaqaale oo weyn oo kor u qaadda doorka istiraatiijiga ah ee Somaliland ee marinnada ganacsiga caalamiga ah.