Dawladda Ingiriiska ayaa wada qorshe ay muwaadiniinteeda ugala baxayso Gobolka Bariga Dhexe, sida ay sheegtay Yvette Cooper, Xoghayaha Arrimaha Gudaha ee Britain.

Yvette Cooper ayaa tilmaantay in dowladda UK ay dejinayso nidaamyo taageero si ay uga caawiso muwaadiniinteeda inay ka baxaan gobolka, halkaas oo lagu qiyaaso in ku dhowaad 300,000 oo British ah ay ku nool yihiin.

Waxay u sheegtay Sky News:

"Waxaan eegaynaa fursado kala duwan oo ballaadhan, waxaana la shaqeyneynaa shirkadaha dalxiiska.”

Sidoo kale, waxay xustay in dowladda ay tixgelin doonto daadgureyn rasmi ah oo loo sameeyo muwaadiniinta, haddii xaaladdu ka sii darto ama ay lagama maarmaan noqoto.

Qorshaha Dowladda UK wuxuu ku salaysan yahay:

Qiimeyn joogto ah oo lagu sameynayo xaaladda amni

La shaqeynta shirkadaha duulimaadyada iyo dalxiiska

Diyaarinta qorshe daadgureyn degdeg ah haddii loo baahdo

Tallaabadan ayaa imanaysa xilli ay sii kordhayaan xiisadaha Bariga Dhexe, taas oo keentay in dalal badan ay dib u eegaan ammaanka iyo badbaadada muwaadiniintooda ku sugan gobolka.