Brussels – Isbahaysiga militariga ee NATO ayaa lagu warramay inuu qayb ka mid ah hawlaha kormeerka hawada ee ay hore ugu beegsan jireen Ruushka u weeciyeen dhinaca Iiraan, iyadoo tallaabadan lagu sheegay mid la xidhiidha kororka xiisadda Bariga Dhexe iyo diyaar-garowga suurtagalka ah ee Mareykanka.

Sida ay sheegtay warbaahinta Bloomberg, diyaaradaha kormeerka hore ee NATO (AWACS) ayaa si joogto ah uga kacaya gudaha Turkiga, iyagoo hawlgallo indha-indhayn ah ka sameynaya hawada u dhow Iiraan, inkasta oo aysan si toos ah u gelin hawada dalkaas. Hawlgalladan ayaa loogu talagalay ururinta xogaha sirdoonka iyo la socodka dhaqdhaqaaqyada militari ee gobolka.

Warbixintu waxay tilmaamaysaa in tallaabadan loo arko mid taageero u ah qorshayaasha Mareykanka ee ku aaddan cadaadiska militari ee lagu saarayo Iiraan, xilli Washington ay ka fiirsanayso weerar militari oo xaddidan haddii wadahadallada nukliyeerka ay fashilmaan.

Dhanka kale, NATO ayaa sidoo kale la sheegay inay diyaarinayso qorshe lagu taageerayo Turkiga, si looga hortago qulqulka qaxooti badan oo ka iman kara dhinaca Iiraan haddii xaaladdu isku beddesho dagaal ama xiisad weyn.

Khubarada arrimaha amniga ayaa sheegaya in dhaqdhaqaaqyadan militari ay muujinayaan heerka sare ee xiisadda ka jirta gobolka, iyadoo la filayo in xaaladdu sii kacsato haddii aan xal diblomaasiyadeed laga gaadhin muranka u dhexeeya Mareykanka iyo Iiraan.