Hargeysa – Wafti sare oo ka socday Hay’adda Qaramada Midoobay u qaabilsan Qaxootiga (UNHCR) ayaa booqasho rasmi ah ku yimid Cusbitaalka Guud ee Hargeysa, halkaas oo kulan muhiim ah kula yeeshay Agaasimaha Cusbitaalka, Dr. Axmed-wali Daahir Xaddi, iyo maamulka cusbitaalka.

Xoojinta Adeegyada Qaxootiga

Kulanka ayaa diiradda lagu saaray xoojinta wada-shaqaynta la xidhiidha adeegyada caafimaad ee la siiyo qaxootiga iyo nabad-galyo-doonka ku sugan Jamhuuriyadda Somaliland.

Labada dhinac ayaa ka wada hadlay sidii loo horumarin lahaa tayada iyo helitaanka adeegyada caafimaad, iyada oo la tixgelinayo baahiyaha sii kordhaya ee bulshada nugul.

Saamaynta Dhaqaale-xumada Caalamka

Sidoo kale, waxa si qoto dheer looga falanqeeyay xaaladda dhaqaale xumo ee ka jirta caalamka, taas oo si toos ah u saamaysay mashaariicda adeeg-bixinta caafimaad, gaar ahaan kuwa loo fidiyo qaxootiga iyo nabad-galyo-doonka.

Maamulka Cusbitaalka Guud ee Hargeysa ayaa warbixin faahfaahsan ka bixiyay adeegyada bilaashka ah ee ay siiyaan qaxootiga, iyaga oo muujiyay dadaallada joogtada ah ee lagu daboolayo baahiyaha caafimaad ee aasaasiga ah.

Qorshe Wadajir ah

Gabagabadii, labada dhinac waxay isku raaceen:

In la sii xoojiyo iskaashiga.

In la diyaariyo qorshe hawleed mideysan.

In la joogteeyo kulamada wada-tashiga.

Ujeeddadu waa in la xaqiijiyo adeeg caafimaad oo tayo leh, waara, isla markaana gaadha dhammaan dadka u baahan, gaar ahaan qaxootiga iyo nabad-galyo-doonka ku sugan dalka.