Hargeysa – Wasiir-ku-xigeenka Wasaaradda Warfaafinta, Dhaqanka iyo Wacyigelinta JSL, ahna ku-simaha Wasiirka, Mudane Muuse Askar Guuleed, ayaa hor tegay Guddida Joogtada ah ee Golaha Guurtida Jamhuuriyadda Somaliland, isaga oo warbixin faahfaahsan ka siiyay hawlaha iyo qorsheyaasha wasaaradda.

Doorka Warfaafinta ee Aqoonsi-raadinta

Wasiirku waxa uu si qoto dheer uga hadlay doorka muhiimka ah ee warfaafintu ku leedahay hawlaha aqoonsi-raadinta Somaliland, isaga oo tilmaamay in warbaahintu tahay laf-dhabarka gudbinta xaqiiqada iyo wacyigelinta bulshada gudaha iyo dibaddaba.

Waxa uu sheegay in wasaaraddu si gaar ah u xoojisay gaadhsiinta fariinta Somaliland ee ku aaddan dawladnimada, dimuqraadiyadda iyo xasilloonida, si loo gaadho saameyn caalami ah.

Mashaariic Horumarineed

Wasiir-ku-xigeenku waxa uu xusay mashaariic muhiim ah oo ay wasaaraddu waddo, kuwaas oo ay ka mid yihiin:

Dhammaystirka Tiyaatarka Wasaaradda

Dhismaha Idaacadda Qur’aanka Kariimka

Ballaarinta gaadhista warbaahinta dalka

Waxa uu tilmaamay in Radio Hargeysa hadda laga dhegeysan karo telefoonada gacanta, taas oo ka faa’iidaysteen bulshada ku nool miyiga iyo deegaannada ka fog ateenooyinka.

Warbaahin Afaf Kala Duwan ku Baxda

Wasaaraddu waxa kale oo ay kordhisay soo saarista warbixinno ku baxa afaf kala duwan sida English iyo Af-Carabi, si fariinta Somaliland loo gaadhsiiyo heer caalami.

Sidoo kale, waxaa la xoojiyay wax-soo-saarka fanka iyo suugaanta, la kordhiyay idaacadaha FM-yada, isla markaana la dardargeliyay dhamaystirka Xeerka iyo Siyaasadda Warbaahinta Qaranka.

Kulankan ayaa muujinaya wada-shaqayn iyo isla-xisaabtan joogto ah oo u dhexeeya hay’adaha fulinta iyo golayaasha qaranka, si loo xoojiyo hufnaanta iyo horumarinta warfaafinta dalka.