Warbixin caalami ah oo ay daabacday shabakadda wararka ee France 24 ayaa ku tilmaantay Jamhuuriyadda Somaliland dal Muslim ah oo si adag ugu dheggan diintiisa Islaamka, balse muujiyay taageero muuqata oo ku aaddan Israel, kadib markii ay si rasmi ah u aqoonsatay madax-bannaanida Somaliland.

Warbixintu waxay iftiimisay waxa ay ku tilmaantay isbeddel layaab leh oo ka dhacay gudaha Somaliland, gaar ahaan caasimadda Hargeysa, halkaas oo dadweyne kala duwan ay si furan u muujiyeen farxad iyo bogaadin ku aaddan go’aanka Israel.

Ramadaan iyo Dareenka Dadweynaha

France 24 waxay si gaar ah diiradda u saartay xilliga warbixintu ku soo beegantay oo ah bisha barakaysan ee Ramadaan, iyada oo xustay in bulshada Muslimiinta ah ee Somaliland ay si cad u muujiyeen aragti ka duwan tan dalal badan oo Muslim ah marka la eego Israel.

Warbixintu waxay soo xigatay muwaadiniin reer Hargeysa ah oo ku sugnaa fagaaraha Khayriyadda, kuwaas oo qaarkood si cad u sheegay inay jecel yihiin Israel, iyaga oo arrintaas ku sababeeyay aqoonsiga iyo waxa ay u arkaan taageero ay ka waayeen dalal kale oo Muslim ah xilligii dagaalladii 1980-meeyadii.

Xusuusta Dagaalladii Hore

Warbixintu waxay tilmaantay in dad badan oo reer Somaliland ahi ay weli xusuus gaar ah ka hayaan duqeyntii 1988-89 ee xilligii taliskii Siyaad Barre, taas oo burburisay qaybo badan oo Hargeysa ah. Taaladda diyaaradda MiG ee taalla badhtamaha magaalada ayaa lagu sheegay astaan xusuus u ah dhacdooyinkaasi.

Qaar ka mid ah dadka la waraystay ayaa sheegay in aqoonsiga Israel uu yahay mid ka tarjumaya xaqiijin muddo dheer la sugayay, isla markaana ay u arkaan tallaabo diblomaasiyadeed oo muhiim ah.

Falcelinta Gobolka

Warbixintu waxay sidoo kale xustay in aqoonsigan uu sababay dood diblomaasiyadeed oo ka dhex qaraxday Geeska Afrika, iyada oo arrintan ay noqotay mid si weyn looga hadal hayo baraha bulshada iyo fagaarayaasha dadweynaha.

France 24 ayaa ku soo gabagabaysay warbixinteeda in Somaliland, oo Muslim ah isla markaana ku taal meel istiraatiiji ah oo Geeska Afrika ah, ay wajahdo marxalad cusub oo diblomaasiyadeed, taas oo laga yaabo inay saameyn ku yeelato xiriirrada gobolka iyo kuwa caalamiga ah.