Hargeysa – Wasiirka Madaxtooyada Jamhuuriyadda Somaliland, Mudane Khadar Xuseen Cabdi, ayaa sheegay in Somaliland ay diyaar u tahay inay la gasho Mareykanka iskaashi dano is-dhaafsi ah, oo ay ku jiraan arrimo la xiriira saldhig militari iyo maalgashiga macdanta qaaliga ah.

Wasiirka oo wareysi siiyay wakaaladda wararka ee Agence France-Presse (AFP), ayaa tilmaamay in labada dhinac ay waxyaabo badan ku heshiin karaan haddii ay wada-hadallo rasmi ah yeeshaan.

Saldhig Milatari iyo Maalgashi Macdan

"Waxa aanu doonaynaa in aanu Maraykanka si gaar ah fursad ugu siino macdanaha qaaliga ah ee Somaliland. Waxa kaloo aanu diyaar u nahay in aanu Maraykanka saldhig millatari siino, iyadoo aanu rumaysanahay in aanu wax ku heshiin karno dawladda Maraykanka,” ayuu yidhi Wasiirka Madaxtooyadu.

Hadalka Wasiirka ayaa muujinaya in Somaliland ay raadineyso iskaashi istiraatiiji ah oo dhinacyada amniga iyo dhaqaalaha ah, gaar ahaan marka la eego muhiimadda juqraafiyeed ee ay ku taallo iyo khayraadka dabiiciga ah ee ay sheegto inay leedahay.

Iskaashi Suurtagal ah

Wasiirku waxa uu xusay in haddii wadahadallo rasmi ah la bilaabo, ay suuragal tahay in la gaadho heshiisyo faa’iido u leh labada dhinac, isagoo muujiyay in Somaliland ay u aragto Mareykanka saaxiib istiraatiiji ah oo suurtagal ah.

Ilaa hadda, ma jiro war rasmi ah oo ka soo baxay Dowladda Mareykanka oo ka hadlaya soo jeedintan. Hadalkan ayaa imanaya xilli ay sii xoogeysanayaan loollanka istiraatiijiga ah ee Geeska Afrika iyo Badda Cas.