Bisha barakaysan ee Ramadaan waa xilli qiimo iyo karaamo gaar ah ku leh quluubta Muslimiinta. Waa bil uu Alle (SWT) si gaar ah u sharfay, una doortay in lagu soo dejiyo Qur’aanka Kariimka ah si uu u noqdo hanuun iyo iftiin dadka u ifaya. Ramadaantu ma aha oo keliya bil la soomo gaajo iyo harraad, balse waa bil nafta la tarbiyadeeyo, qalbiga la nadiifiyo, camalkana la toosiyo.

 

Fadliga iyo Naxariista Ramadaan

 

Ramadaan waa bil ay albaabada Jannadu furmaan, kuwa Naartana la xidho, shaydaankana la xakameeyo. Waa bil dembi-dhaaf iyo naxariis badan, qofkii si iimaan leh oo ajar sugid ah u soomaana wuxuu helaa dambi-dhaaf ballaadhan. Sidaas darteed, waa fursad qaali ah oo qof walba dib ugu milicsan karo naftiisa, uga toobad keeni karo khaladaadkii hore, kuna bilaabi karo nolol cusub oo ku dhisan cibaado iyo dhawrsanaan.

 

Ramadaan iyo Qur’aanka Kariimka ah

 

Bishan barakaysan waxa si gaar ah loola xidhiidhiyaa Qur’aanka Kariimka ah. Muslimiintu waxay ku dadaalaan akhriskiisa, fahamkiisa iyo ku camal faliddiisa. Guryaha waxa laga maqlaa akhrinta Qur’aanka, masaajiddadana waxa lagu tukadaa salaadaha Taraawiixda oo lagu dhegeysto aayaadka Qur’aanka. Qofka qalbigiisu furan yahay wuxuu dareemaa xasillooni iyo deggenaansho uu ku helo la falgalka hadalka Eebbe.

 

Bil Samafal iyo Walaaltinimo

 

Ramadaan sidoo kale waa bil samafal iyo walaaltinimo. Dadku way isku naxariistaan, waxayna kordhiyaan sadaqada iyo caawinta masaakiinta. Qofka sooman wuxuu si toos ah u dareemaa baahida dadka tabaalaysan, taas oo ku abuurta qalbi jilicsan iyo damqasho. Sidaas ayay Ramadaantu u dhistaa bulsho isku duuban oo is jecel.

 

Sida Looga Faa’iidaysto Ramadaan

 

Si looga faa’iidaysto bishan barakaysan, waa in la yeesho niyad saafi ah iyo qorshe cad. Qofku waa inuu wakhtigiisa si xikmad leh u maareeyo, isaga oo mudnaan siinaya salaadda, ducada iyo akhriska Qur’aanka.

 

Sidoo kale waa in laga fogaadaa wax kasta oo ajarka dhimi kara sida xanta, beenta iyo muranka aan faa’iidada lahayn. Ramadaantu waa bil is-xakameyn iyo sabar; qofka naftiisa xakameeya bishan, si fudud ayuu u sii wadan karaa wanaagga sannadka intiisa kale.

 

Tobanka Dambe iyo Laylatul Qadri

 

Tobanka dambe ee Ramadaanta waxa ku jira habeen aad u qiimo badan oo loo yaqaan Laylatul Qadri – habeen ka khayr badan kun bilood. Cibaadada iyo ducada habeenkaasi waa mid leh ajar aan la qiyaasi karin, sidaa darteed Muslimiintu waxay ku dadaalaan inay habeenadaas ku qaataan cibaado, baryo iyo tawbad.

 

Gunaanad

 

Gebogabadii, Ramadaan waa dugsi ruuxi ah oo qofka baraya samirka, cibaadada, is-xakameynta iyo samafalka. Waa bil qofka siinaysa fursad uu ku saxo khaladaadkii hore, kuna xoojiyo xidhiidhka uu la leeyahay Rabbigiisa. Qofkii si dhab ah uga faa’iidaysta Ramadaan, wuxuu ka baxaa bishan isagoo leh qalbi nadiif ah, iimaan xooggan, iyo himilo cusub oo wanaag ku hagaajisay naftiisa.