Hargeysa – Wasiirka Wasaaradda Diinta iyo Awqaafta JSL, Sheekh Cabdilaahi Baashe, ayaa ku dhawaaqay in maalinta Axadda ee toddobaadka soo socda, oo ku beegan 22-ka Febraayo, guud ahaan dalka laga oogi doono Salaad Roob-doon ah, xilli Somaliland ay wajahaysi xaalad abaareed oo saameysay dad iyo duunyaba.

Goobaha Lagu Tukanayo Hargeysa

Wasiirku waxa uu sheegay in caasimadda Hargeysa Salaadda Roob-doonta lagu tukan doono afar masaajid oo kala ah:

Masjid Jaamaca

Masjidka Tabliiqa

Masjidka Ibraahim Dheere

Masjidka Cali Mataan

Sidoo kale, salaadda waxaa lagu tukan doonaa goobaha lagu ooggo salaadaha Ciidda ee ku yaalla degmooyinka Hargeysa.

Baaq ku Socda Maamullada iyo Shacabka

Sheekh Cabdilaahi Baashe ayaa faray guddoomiyayaasha gobollada, madaxda dowladaha hoose iyo isuduwayaasha wasaaradda inay ka qaataan doorkooda abaabulka iyo hirgelinta salaadda roob-doonta.

Wasiirku waxa uu sidoo kale shacabka ugu baaqay inay saddexda maalmood ee ka horreeya maalinta la asteeyey ku bixiyaan towbad, istighfaar iyo dambi-dhaaf waydiisasho Alle, si loo baryo roob iyo raxmad.

Xaaladda Abaarta

Ku dhawaaqista salaadda roob-doonta ayaa imanaysa xilli dalka uu ku jiro xaalad abaareed oo saameyn ku yeelatay nolosha dadka iyo xoolahaba, iyadoo wasaaraddu ku boorrisay bulshada inay isu diyaariyaan salaadda iyo ducada si wadajir ah.