Addis Ababa, Itoobiya – Wasiirka Ganacsiga iyo Dalxiiska Jamhuuriyadda Somaliland, Cabdiraxmaan Xasan Nuur, oo safar shaqo ku jooga magaalada Addis Ababa, ayaa kulan muhiim ah la yeeshay madaxda iyo khubarada French Centre for Ethiopian Studies, oo la aasaasay sannadkii 1952.

Iskaashi ku Saabsan Aasaarta iyo Dalxiiska

Kulanka ayaa diiradda lagu saaray xoojinta iskaashi ku saabsan:

Horumarinta cilmi-baadhista aasaarta qadiimiga ah

Tababarrada shaqaalaha Waaxda Dalxiiska iyo Aasaarta

Daraasado lagu sameeyo goobaha taariikhiga ah ee Somaliland

Si gaar ah, waxaa laga wada hadlay qorshe la xidhiidha dib-u-dhis iyo cilmi-baadhis lagu bilaabayo Masjid Qiblatayn ee Saylac, oo ka mid ah goobaha taariikhiga ah ee qiimaha weyn leh.

Qorshaha Heshiis Is-afgarad (MoU)

Labada dhinac ayaa isku raacay in la diyaariyo heshiis is-afgarad (MoU) oo saldhig u noqda iskaashi mustaqbalka, si loo xoojiyo cilmi-baadhista, ilaalinta iyo horumarinta dhaxalka taariikhiga ah.

Kulankan ayaa muujinaya dadaalka ay xukuumaddu ugu jirto kor u qaadista dalxiiska iyo ilaalinta hidaha iyo dhaqanka qaranka, iyada oo la xoojinayo iskaashiga hay’adaha caalamiga ah ee ku takhasusay daraasaadka taariikhiga ah.