Berbera – Madaxweynaha Somaliland, Cabdiraxmaan Maxamed Cabdilaahi (Cirro), ayaa shaaciyay in la sii dhimi doono qiimaha laydhka magaalada Berbera marka la soo gebogabeeyo mashruuca balaadhinta korontada.

Madaxweynaha ayaa carrabka ku adkeeyay in korontadu ay tahay adeeg aasaasi ah oo laf-dhabar u ah nolol-maalmeedka bulshada iyo koboca dhaqaalaha.

"Laydhku maanta waxa uu kow ka yahay nolosheena oo qofna kama maarmo. Berbera laydhkeeduna maanta iyadaa ugu jaban, marka uu dhamaado Mashruuca Balaadhinta waan u sheegay madaxda in la sii jabiyo laydhka Berbera,” ayuu yidhi Madaxweyne Cirro.

Mashruuca Balaadhinta Korontada

Mashruuca balaadhinta korontada Berbera ayaa la filayaa inuu kordhiyo awoodda wax-soo-saarka tamarta, hagaajiyo tayada adeegga, isla markaana yareeyo kharashaadka ku baxa korontada.

Madaxweynaha ayaa xusay in tallaabadani ay qayb ka tahay qorshaha xukuumadda ee lagu xoojinayo kaabeyaasha dhaqaalaha, isla markaana lagu fududeynayo nolosha shacabka iyo ganacsatada.

Horumarka Berbera

Berbera oo ah xarun ganacsi iyo deked istaraatiiji ah ayaa lagu tilmaamay inay horey uga mid tahay magaalooyinka leh qiimaha laydhka ugu jaban dalka, iyadoo xukuumaddu ballanqaadday in la sii wadi doono dadaallada lagu horumarinayo adeegyada aasaasiga ah.

Go’aankan ayaa la filayaa inuu dhiirrigeliyo maalgashiga, kobciyo ganacsiga, isla markaana kor u qaado heerka nololeed ee bulshada reer Berbera.