Hargeysa – Agaasimaha Guud ee Wasaaradda Xannaanada Xoolaha iyo Horumarinta Reermiyiga Somaliland, Mudane Ahmed Osman Jama, oo ay weheliyaan Agaasimaha Qorsheynta Dr. Maxamed Waaberi iyo La-Taliyaha Sare ahna Madaxa Mashruuca KOICA Mudane Ridwaan Cismaan, ayaa kulan wadajir ah la qaatay masuuliyiin ka socotay hay’adaha kala duwan ee ka shaqeeya mashruuca ay maalgeliso KOICA.

 

Kulanka waxaa ka qayb galay wakiillo ka socday World Food Programme (WFP), Save the Children, iyo ururka maxalliga ah ee SCAN.

 

Xoojinta Fulinta Mashruuca

 

Doodaha kulanka ayaa diiradda lagu saaray xoojinta wada-shaqeynta, mideynta fulinta mashruuca, iyo dardargelinta hawlaha socda iyo kuwa qorshaysan, si si wax-ku-ool ah loogu daboolo baahiyaha bulshada uu mashruucu bartilmaameedsanayo.

 

Dhinacyadu waxay is-dhaafsadeen warbixino ku saabsan shaqooyinka la qabtay iyo kuwa u baahan in si wadajir ah loo fuliyo, iyaga oo isku raacay in la adkeeyo isku-duwidda hawlaha iyo wada-shaqeynta joogtada ah ee u dhexeeya Wasaaradda iyo hay’adaha la shaqeeya.

 

Shahaado Sharaf

 

Gebo-gabadii kulanka, Agaasimaha Guud ayaa shahaado sharaf guddoonsiiyay hay’adda WFP, taas oo uu ku wareejiyay wakiilka ka socday hay’adda, si loogu muujiyo doorka milgaha leh iyo wada-shaqeynta wax-ku-oolka ah ee ay la leeyihiin Wasaaradda.

 

Kulankan ayaa muujinaya dadaallada lagu xoojinayo hirgelinta mashaariicda horumarineed ee taageeraya xoola-dhaqatada iyo bulshada reer miyiga ah.