Hargeysa – Ciidanka Qaranka Somaliland ayaa si rasmi ah u soo gaba-gabeeyey shir maalmo socday oo lagu qiimeynayay waxqabadkii sannadkii tegay, isla markaana lagu dejinayay qorshayaasha istaraatiijiyadeed ee sannadka 2026-ka.

 

Amniga Dalka iyo Mandaqada

 

Shirka ayaa si qoto dheer looga falanqeeyey xaaladda amniga dalka iyo tan mandaqada, iyadoo la isla qaatay in la xoojiyo feejignaanta, wada-shaqaynta hay’adaha amniga iyo isku-duwidda hawlgallada lagu sugayo nabadda iyo xasilloonida.

 

Taliska Guud ayaa adkeeyey in isbeddellada amni ee ka jira gobolka ay u baahan yihiin diyaar-garow joogto ah iyo qorshe hawleed mideysan oo lagula tacaalo khatar kasta oo iman karta.

 

Baaq ku Socda Shacabka

 

Ciidanka Qaranka ayaa shacabka Somaliland ugu baaqay inay si midnimo leh ula garab istaagaan ciidanka, si loo adkeeyo difaaca qaranka, loona ilaaliyo nabadda iyo xasilloonida guud ee dalka.

 

Waxa la caddeeyey in wada-shaqaynta shacabka iyo ciidanku ay laf-dhabar u tahay adkaynta amniga iyo difaaca madax-bannaanida qaranka.

 

Dib-u-habayn iyo Tayayn Tababareed

 

Shirka waxa kale oo xoogga lagu saaray dib-u-habaynta iyo tayeynta tababarada ciidanka, iyadoo la mideynayo manhajka waxbarasho ee dugsiyada tababarka iyo kor u qaadista tayada macallimiinta iyo maamulka xarumaha tababarka.

 

Taliska ayaa bogaadiyey macallimiintii door muuqda ka qaatay horumarinta tababarada, iyaga oo lagu ammaanay dedaalka ay geliyeen dhismaha ciidan aqoon, anshax iyo karti leh.

 

Casriyeynta Shuruucda Ciidanka

 

Sidoo kale, shirka ayaa lagu falanqeeyey dib-u-eegista iyo casriyeynta shuruucda ciidanka si loo waafajiyo isbeddellada amni iyo baahiyaha cusub ee dalka, loona hubiyo in nidaamka ciidanku la jaanqaadayo horumarka iyo duruufaha taagan.

 

Gunaanad

 

Taliska Guud ee Ciidanka Qaranka Somaliland ayaa mar kale caddeeyey in ilaalinta madax-bannaanida, difaaca qaranka iyo nabadda shacabka ay yihiin waajib qaran oo aan laga gorgortami karin, isla markaana ay ka go’an tahay sii xoojinta tayada, tababarka iyo feejignaanta ciidanka sannadaha soo socda.