Guddoomiyihii hore ee Wasaaradda Waxbarashada gobolka Togdheer, Mudane Maxamuud Xasan Caynaanshe, iyo guddoomiyaha cusub ee dhawaan uu soo magacaabay Wasiirka Wasaaradda Waxbarashada Jamhuuriyadda Somaliland, Mudane Shaafici Nuur Jaamac, ayaa maanta si rasmi ah xilkii ula kala wareegay.

Munaasibadda xil-wareejinta, oo lagu qabtay xarunta Xafiiska Imtixaanaadka Qaranka ee gobollada bari ee magaalada Burco, waxa ka soo qayb galay masuuliyiin kala duwan oo heer gobol iyo heer degmo ah oo ka tirsan gobolka Togdheer, qaar ka mid ah shaqaalaha Wasaaradda Waxbarashada ee gobolka, salaadiin, aqoonyahanno, iyo marti sharaf kale oo tiro badan.

Masuuliyiintii kala duwanaa ee munaasibadda ka hadlay ayaa dhammaantood adkeeyay muhiimadda ay waxbarashadu u leedahay horumarka bulshada, iyagoo ku boorriyay in si wadajir ah gacmaha la isugu qabsado horumarinta waxbarashada gobolka Togdheer.