Salaaddan ayaa fiidnimadii Talaadada lagu oogay masaajidka caanka ah ee Baluch ee ku yaalla magaalo xeebeedka Mombasa ee dalka Kenya.

In janaaso qaa’ib ah la tukado waxay tilmaamaysaa in qoyska duuliye sare Yared aysan filayn in ay helaan maydka wiilkooda, ayuu yiri wariyaha BBC Wazir Khamsin oo ku sugan magaalda caasimadda ah ee Nairobi.

Omammy Dallah oo wax ku qora baraha bulshada ayaa soo dhigay salaadda oo dadka oogaya uu ka mid ahaa wiil ay walaalo yihiin duuliye sare Yared.

Duuliye sare Yared ayaa ahaa Itoobiyaan iyo Kenyan iska dhal ah, qaar ka mid ah qoyskiisa dhaw ayaana ku nool magaalada Mombasa.

Dadka tukaday janaasada waxaa ka mid ahaa Munir Mazrui oo ka mid ah dadka Kenyanka ah ee ku caanbaxay u dhaqdhaqaaqidda xuquuda aadanaha iyo Maxamed Xirsi oo caan ku ah arrimaha hoteellada.

Sources: BBC