Rwanda ayaa martigelisay toddobo muhaajiriin ah oo laga soo tarxiilay Maraykanka horraantii bishan. Afhayeen u hadlay dawladda ayaa bayaan uu soo saaray ku sheegay Khamiistii, toddobaadyo kaddib markii ay labada dal gaadheen heshiis ku saabsan qaabilaadda ilaa 250 qof oo soogalooti ah.

"Kooxdii ugu horreysay oo tiro ahaan dhan toddoba muhaajiriin ah oo baadhitaan lagu sameeyay ayaa Rwanda soo gaadhay badhtamihii August," afhayeenka dawladda Rwanda u hadashay oo la yidhaahdo Yolande Makolo ayaa sidaasi sheegtay.

"Saddex ka mid ah shakhsiyaadka la soo celiyay ayaa muujiyay rabitaan ah in ay dib ugu noqdaan dalalkooda, halka afar kale ay rabaan in ay sii joogaan oo ay nolol ka samaystaan dalka Rwanda. Dhammaan dadkaasi waxay dawladda Rwanda ka heli doonaan taageero iyo ilaalin ku habboon."

Madaxweynaha Maraykanka Donald Trump ayaa qaaday tallaabo adag oo dhanka dadka soogalootiga ah, isaga oo damacsan in malaayiinta muhaajiriinta ah ee Maraykanka ku sugan ee aan sharciyada haysan dalkaasi laga tarxiilo.

Afhayeen u hadlay Wasaaradda Arrimaha Dibadda Maraykanka ayaa horraantii bishan su'aalo ku saabsan masaafurinta u gudbiyay dowladda Rwanda, wuxuuna diiday in uu ka hadlo faahfaahinta xidhiidhka diblomaasiyadeed iyo wadahadallo ay dawladaha kale la yeesheen.

"Hirgelinta siyaasadaha socdaalka ee Maamulka Trump waa la siinayaa mudnaanta koowaad ee Wasaaradda Arrimaha Dibadda. Sida Xoghaye Rubio uu hore u sheegay, waxaan ku sii taagnaan doonnaa go'aankeenna ah in aan joojinno socdaalka sharci-darrada ah iyo dadaallada ballaadhan ee ku aaddan xoojinta amniga xuduudaha Mareykanka," ayuu yidhi afhayeenku.

Waaxda Amniga Gudaha ee Mareykanka ayaan ka jawaanib su'aal arrimahan laga weyddiiyay.

Horraantii August, Rwanda iyo Maraykanku waxay wada galeen heshiis ay Rwanda ku qaadanayso ilaa 250 muhaajiriin ah, iyada oo Washington u dirtay Rwanda liis bilow ah oo 10 qof qof ka kooban.

Kigali ayaa sannadihii u dambeeyay isu taagtay in ay noqoto waddan martigeliya muhaajiriinta oo ay wadamada reer galbeedku jeclaystaan in ay dalkooda ka saaraan. Arrintan waxa walaac xooggan ka muujinaya kooxaha u dhaqdhaqaqaa xuquuqda aadanaha.

Maamulka madaxweyne Trump ayaa sheegay in u masaafurinta dalka saddexaad ay gacan ka geysaneyso in si degdeg ah loo saaro qaar ka mid ah muhaajiriinta, oo ay ku jiraan kuwa dambiyada galay.

Dadka ka soo horjeeda soogalootiga ayaa u arka in dadkaas oo loo diro waddan saddexaad ay tahay hab lagula tacaalo dembiilayaasha aan si fudud loo tarxiili karin oo khatar ku noqon kara dadweynaha.

Waxa jira dad badan oo arrintan dhalleeceeya ayaa sheegaya in qorshahani uu halis gelin karo dadka muhaajiriinta ah, maaddaama dadka loo diri karo waddamo ay kala kulmi karaan rabshado iyo dhibaato la xidhiidha luuqadaha waddamadaasi lagaga hadlo oo aanay garanayn.

Makolo waxa uu sheegtay horraantii bishan in sida uu dhigayo heshiiska lala galay Washington, muhaajiriinta loo tarxiilayo Rwanda la siin doono tababaro shaqo, daryeel caafimaad, iyo hoy.

Khamiistii, Makolo waxa uu sheegay in dadka loo musaafuriyay Rwanda ay la socdeen hay'ad caalami ah, islamarkaana ay komeer ku samaysay Hay'adda Caalamiga ah ee Socdaalka iyo Adeegga Bulshada ee Rwanda.

Sharci miyuu Maraykanku u haystaa inuu dambiilayaal u tarxiilo Afrika

Maamulka Mareykanka ayaa u jeestay qaarada Afrika, bal in ay noqon karto meel kale oo loo soo tarxiilo dadka soo galootiga ah ee uu sheegay in ay dambiilayaal yihiin.

Iyadoo tiro dad ah loo tarxiilay dalalka Bartamaha iyo Koonfurta Ameerika, ayaa 12 nin oo ka ka soo jeeda dalal ay ku jiraan Mexico, Myanmar iyo Yemen ayaa bishii hore loo diray Eswatini iyo Koonfurta Suudaan. Hal qof oo u dhashay Koonfurta Suudaan ayaa sidoo kale dib loo celiyay.

Wadamada kale ee Afrika ayaa sidoo kale lagu soo waramayaa in Mareykanka uu ku cadaadinayo in ay aqbalaan dadka aysan dalalkooda dib ugu celin doonin, sida ay sheegeen mas'uuliyiinta Mareykanka.

Ballanqaadkii madaxweyne Donald Trump ee ahaa in la tarxiilo muhaajiriinta ayaa taageero kasbaday intii uu ololaha ku jiray sannadkii hore. Balse khubarada xuquuqda aadanaha u dooda ee Qaramada Midoobay iyo hay'adaha u dooda xuquuqul insaanka ayaa ka dardaar werinaya sida wax u dhaceen, waxayna ku doodayaan in tarxiilka lagu hayo dalal aan ahayn dalalka ay ka soo jeedaan muhaajiriinta ee loo yaqaanno dalalka saddexaad ay ku xad-gudbi karaan shuruucda caalamiga ah.

In dadka loo tarxiilo dal seddexaad ma sharci baa?

Dal seddexaad oo qofka loo tarxiilo wuxuu noqon sharci ahaan arrin macquul ah, balse shuruud ayaa ku xiran.

"Dhammaan fikradda ka saaritaanka dalka iyo u wareejinta waddan saddexaad waa in laga arkaa fikradda guud ee magangelo doonka" ayuu yiri Prof Ray Brescia, oo ka socda kulliyadda Sharciga ee Albany ee Maraykanka.

"Waxaa jira mabda'a sharciga caalamiga ah, 'dib u celin la'aanta, taas oo macnaheedu yahay inaadan qof ku celinin waddankiisa haddii uusan ammaan ahayn, markaa waddan saddexaad ayaa soo bandhigi kara beddelka badbaadada" ayuu yiri.

Mabda'ani ma khuseeyo oo keliya waddanka muhaajiriinta ay ka soo jeedaan, laakiin sidoo kale waddan kasta oo saddexaad oo loo diri karo ayuu khuseeyaa.

Haddii wadanku aanu nabad ahayn, ka saaritaanka wuxuu jabin karaa sharciga caalamiga ah, sidii markii maxkamada sare ee UK ay hor istaagtay qorshihii ay dawladda UK ku doonaysay in magangalyo doonka loogu diro Rwanda sanadka 2023-ka.

Muhaajiriinta waa in ay helaan fursad ay uga hortagaan masaafurinta haddii ay halis ku jiraan, iyadoo lagu saleynayo caddeymaha laga helay ilo lagu kalsoonaan karo sida warbixinnada Qaramada Midoobay ama natiijooyinka Waaxda Arrimaha Dibadda Mareykanka. Maxkamadaha waxaa laga filayaa inay si taxadar leh u qiimeeyaan khatartan.

Bbc/somali