Madaxweyne Cirro oo Qalin-jabinta Jaamacadda Hargeysa ka Jeediyay Khudbad Taariikhi ah
0
Friday August 29, 2025 - 09:35:51 in News by Xaaji Faysal
- Visits: 125
-
- Share
Maanta idinku nasiib ayaad u leedihiin, waalidiintiinna ayaad la joogsateen
"Waxbarashada maanta meel dheer bay maraysaa, balse baahiyo badan baa weli jira."
Hargeysa (Dawan) Madaxweynaha Jamhuuriyadda Somaliland, Mudane Cabdiraxmaan Maxamed Cabdillaahi (Cirro), ayaa maanta khudbad qiimo badan jeediyay xafladda qalin-jabinta Jaamacadda Hargeysa, taasoo ay ka qayb galeen arday, waalidiin, maamulka jaamacadda iyo masuuliyiin kale.
Madaxweynaha ayaa hambalyo u diray ardayda qalin-jabisay isagoo xusay in waxbarashada maanta ay ka horumarsan tahay tii xilligii uu isagu dugsiga sare ka baxay 1977-kii.
Waxaanu yidhi."Wakhtigayagii, jaamacado dalka gudihiisa lagama helin.
Qofkii waxbarasho doonaya wuxuu u safri jiray Muqdisho.
Maanta idinku nasiib ayaad u leedihiin, waalidiintiinna ayaad la joogsateen jaamacado gudaha dalka ah,”
Wuxuu xusay in dugsiyadii sare ee wakhtigiisii maanta noqdeen jaamacado waaweyn sida Jaamacadda Camuud, Jaamacadda Hargeysa, iyo kuwa kale taas oo uu ku tilmaamay horumar weyn oo dalka laga gaadjay.
1,355 Arday ayaa Qalin-jabisay/ 52% Hablaha Ah
Madaxweynaha ayaa sheegay in sanadkan Jaamacadda Hargeysa ay ka qalin-jabiyeen 1,355 arday, kuwaas oo dhamaystay heerarka kala duwan ee waxbarashada sare.
Wuxuu si gaar ah ugu hambalyeeyay hablaha oo tiradoodu tahay 52%,.
Waxaanu yidhi."Waxaan rajaynayaa sidii aad waxbarashada uga hormartaan wiilasha inaad siyaasadda na uga hormari doontaan mustaqbalka.”
Saddex Baahiyood oo Muhiim ah oo Jaamacadda Hargeysa ka jira iyo qorshaha xukuumadda.
Madaxweyne Cirro wuxuu khudbaddiisa ku sheegay in Jaamacadda Hargeysa ay qabto saddex baahi oo waaweyn.
Xarun cusub oo maamul
Madaxweynaha JSL, Mudane Cabdiraxmaan Cirro ayaa ballan qaaday in la dhisayo xaruntan casriga ah.
Dhakhtar u gaar ah Medical School-ka : Madaxweynaha ayaa sheegay in ay wadaan raadinta xal, haddii aanay dowladdu dhisinna cid kale ayaa laga raadin doonaa.
Dhulka jaamacadda oo dad haystaan
Wuxuu amar ku bixiyay in dhulkaasi loo celiyo jaamacadda, isagoo arrintaas u xilsaaray Wasaaradda Hawlaha Guud, Maayarka, Madaxtooyada iyo Taliyaha Booliska.
Cilmi-baadhista iyo Kobcinta Jaamacadaha
Madaxweynuhu wuxuu hoosta ka xarriiqay muhiimadda cilmi-baarista.
Wuxuu tusaale usoo qaatay xarunta xoolaha ee ku taal Sheekh oo uu sheegay in ay leedahay laboratariyo malaayiin dollar ah balse aan laga faa’iidaysan, taasoo uu ku tilmaamay fursad weyn oo lagu horumarin karo xoolaha, beeraha iyo cilmiga dalka.
Shaqo la’aanta Ardayda Qalin-jabisa
Wuxuu caddeeyay in shaqo la’aantu tahay caqabad wayn, balse dowladda Somaliland ay qorshaynayso nidaam lagu beddelayo shaqaalaha hawlgabka ah si arday cusub shaqo u helaan.
Waxa kale oo uu sheegay in sanduuqa dhalinyarada la kicin doono si loo taageero ardayda leh fikradaha ganacsi ama mihnadeed.
Maalgashi iyo Kobcinta Dhaqaalaha
Madaxweyne Cirro wuxuu ugu dambayn sheegay in dowladda xukuumadiisu xoog saarayso maalgashiga gudaha, gaar ahaan meelaha muhiimka u ah dhaqaalaha dalka sida:
Xoolaha
Macdanta
Beeraha
Kaluunka
Dalxiiska
Gaba-gabadii
Khudbaddan ayaa ahayd mid taabanaysa taariikh, horumar, caqabadaha jira, iyo himilooyinka mustaqbalka ee la xidhiidha waxbarashada, shaqo abuurka iyo horumarinta dhaqaalaha Somaliland.
Madaxweynaha ayaa muujiyay in xukuumaddiisu diyaar u tahay wax-ka-qabashada baahiyaha waxbarasho iyo kuwa shaqo la’aaneed ee dhalinyarada qalin-jabisay.
Loading...
Loading...