Waa Bukaan socod, Barlaawe agoon ah iyo baahi qabe da’yar oo uu si war ma qabto ah ula kulmay madaxweynaha Jamhuuriyadda Somaliland Md. Cabdiraxmaan Maxamed Cabdilaahi (Cirro) xilli uu booqasho ugu tegay carruur ku ciyaarayey xarunta Cosob ee Magaalada Hargeysa maalintii labaad ee Ciiddal-fidriga oo uu madaxweynuhu tegay dhowr goobood oo ay da’yartu ku damaashaadayeen farxadii Ciidda.

Saamiya Saleban Cabdi Yuusuf oo ah gabadh yar oo 8 sano jir aggoon ah oo madaxa Burro kaga taalo, ayaa kamid ahayd boqolaal Carruur ah oo goobtaasi ku sugnaa, kuwaasoo ay kedis iyo fila-waa ku ahayd booqashada madaxweynuhu, inay la kulmaanna farxadoodii hore sii muunaysay. Laakiinse Saamiya oo kamid ahayd ubadka meesha joogay oo ay Hooyaddeed sinta ku siday ayey arragtida madaxweynuhu u ahayd munaasibad gaar ah oo ay dhabarka iyadoo saaran jamatay.

Saamiya waxay kamid tahay saddex Carruur ah oo agoon ah oo ay dhashay Foosiya Cabdi Caabi Faarax.

Markii la baahiyey sawirrada madaxweynaha oo Saamiya yar salaamaya oo si naxariis leh gacmaha ugu haya dhabanadeeda, waxa ka dhalatay falcelin aad loogu faafiyey baraha bulshada, taasoo ay bixiyeen dadkii xogogaalka iyo qooninka u lahaa Saamiya Xaaladdeed Bukaan, daryarnimada qoyskooda iyo baahida ay u qabtay inuu ogaado madaxweynuhu duruufta ay qabto.

Madaxweynuhu kama war qabin xaaladdeeda, suurtogalna may noqon in xogteedu gaadho, sidaasoo ay wali fursadaasi kama lumin Saamiya, sida ay Hooyaddeed Foosiya qabto.

Foosiya ayaa Wargeyska Dawan u sheegtay in Saamiya xanuunku la soo dersay iyadoo lix bilood oo qudha jirta, isla markaan uu kaga bilaabmay biyo xidhan oo kaga furmay Madaxa qaybta Maskaxda ee dhinaca Midig, taasina ay ka dhigtay qof aan hadlin karin, Cagaha aan ku kici karin, ahna Baralaays.

"Dhakhaatiirta Somaliland iyo kuwa Itoobiya labaduba waxay igu yidhaahdeen Hindiya ayaa ugu dhaw meel wax loogu qaban karo oo qalliin loogu samayn karo, aniguna waxaan ahay Hooyo faro-madhan aggoontaa haysata, sidaas ayuunbaan dhabta ugu hayaa. Bukaanka Gabadha waxa noo dheer waxaanu nahay Barlaawe, halkaa iminka Buulka yar nooga dhisan yahay oo Biyo mareen ah waxa si ku-meel-gaadh ah noo dejiyey dad muxsiniin ah. Suuqa ayaan uga soo shaqayn jiray berigii hore, balse muddo hal sanno ah kama bixin oo waxaan iska daayey markii uu halkan daad ka qaadi gaadhay ee laga reebay maalin anigoo suuqa ku maqan!naxdintii ayaan aniguna wareeray oo aan shaqadii tegi kari waayey” ayey tidhi Hooyo Foosiya.

Foosiya waxa ay dalbatay oo ay Qaranka Somaliland madax iyo shacab ka codsatay in laga caawiyo baahida Caafimaad ee ay qabto Inanteeda Saamiya, xaaladaasoo ah mida ugu darran ee tiiraanyada ku haysa.

Abwaan Maxamed Aw Cali Cartan oo kamida dadka xogogaalka u ah Saamiya iyo Qoyskooda, ayaa isna tilmaamay in aanay Hooyada dhashay tahli karin qadarka dhaqaale ee ay caafimaadka ugu baahantahay Saamiya, isla markaana uu kamid ahaa dadkii ku war helay baahinta sawirrada madaxweynaha oo Saamiya si naxariis leh u salaamay, kaddibna dareen celinta codsiga ah gudbiyey.

Madaxweynaha Jamhuuriyadda Somaliland Md. Cabdiraxmaan Maxamed Cabdilaahi Cirro oo ah hogaamiye naxariis badan, ayey dadka badan ee ka fal-celiyey la kulankiisa Saamiya oo aanu ka war-qabin xaaladdeeda markaa, waxa ay ka codsadeen inuu taageero u fidiyo.

Waxa kale oo falcelimaha kamida talo soo jeedin madaxweynaha lagu siiyey in la sameeyo xarun gaar ah oo bulshada danyarta ah ka caawisa adeegyada Caafimaad ee aanay awooddi karin kharashkooda.

Tanina waa farriin kale oo muhiimad gaar ah u leh badqabka iyo badbaadinta bulshada nugul dhaqaale ahaan.

Dabagalka uu Wargeyska Dawan ku sameeyey dhacdadani maaha mid looga dan leeyahay in lagu xujeeyo madaxweynaha, mana aha arrin xiiso warbaahineed looga dan leeyahay, hase yeeshee waxa keliya ee ay Dawan uga dan lahayd waa xaqiijinta jiritaanka xogta lagu faafiyey baraha bulshada ee ku saabsan Saamiya iyo in aan soo gudbino farriin dhamaystiran oo ku saabsan baahideeda Caafimaad.