Hay’adda Caalamiga ah ee Taiwan u qaabilsan Iskaashiga iyo Horumarinta, oo kaashanaysa Jaamacadda Pennsylvania ee Maraykanka, ayaa toddobaadkan dhammaystirtay mashruuc garaadka macmalka ah lagaga hirgelinayo nidaamka macluumaadka caafimaadka ee Somaliland.

Sida ay hay’adda iskaashiga caalamiga ee Taiwan shaacisay oo ay soo xigatay wakaaladda wararka Somaliland ee SOLNA, tallaabadan waxay qayb ka tahay Mashruuca Horumarinta Wax-ku-oolnimada macluumaadka Caafimaadka ee Somaliland, kaasi oo ka soo farcamay heshiis iskaashi oo bishii Diseembar ee la soo dhaafay ay kala saxeexdeen weftiga farsamada ee hay’addu ku leedahay Geeska Afrika, kulliyada Ganacsiga ee Jaamacadda Pennsylvania, iyo Wasaaradda Horumarinta Caafimaadka ee Somaliland.

Weftiga farsamada ee hay’adda iskaashiga caalamiga ah ee Taiwan, ayaa mas’uul ka ahaa horumarinta nidaamka dhinaca goobaha laga fulinayo mashruuca garaadka macmalka ah, halka wasaaradda caafimaadka Somaliland loo xilsaaray isku-dubaridka tijaabinta Cisbitaallada iyo hirgelinta nidaamka, sida uu sheegay Mario Lin oo ah maamulaha mashruucaasi.

Waxa kaloo sarkaalkaasi intaas ku daray in jaamacadda Pennsylvania ay naqshadeeyay xeerarka garaadka macmalka ah islamarkaana ay bixisay taageerada maaliyaddeed ee isku xidhka server-rada garaadka macmalka ah.

Mario Lin waxa kale oo uu xusay in shaqada cusub ee garaadka macmalka ahi ay ka caawinayso shaqaalaha caafimaadka samaynta diiwaannada caafimaad ee elektarooniga ah, taasoo si weyn kor ugu qaadaysa waxtarka baadhitaanka bukaan-socodka, gaar ahaan xaaladaha adag ee u baahan dabagal faahfaahsan.

Hay’adda iskaashiga caalamiga ah ee Taiwan waxa ay caddaysay in guusha natiijada mashrruucan laga gaadhay ay ka dhalatay heshiis iskaashi farsamo oo ay labada dal ee Somaliland iyo Taiwan ay kala saxeexdeen sannadkii 2020kii.