Ganacsatada shidaalka ee magaalada Wajeer ee gobolka waqooyi bari Kenya ayaa xiray xarumahooda shidaalka, ka dib amni darro ay sheegeen inay ku soo noqnoqtay, taasi oo saameyn ku yeelatay dhaqdhaqaaqoodii ganacsiga, kuna kaliftay inay shaqo joojin sameeyaan.

Ku dhowaad 17 xarumood oo shidaalka lagu iibiyo ayaa xirmay sida ay warbaahinta u sheegeen ganacsatada.

Cabashadooda ayaa salka ku haysa dad hubaysan oo dhac iyo dhibaatayn kale u gaysanaya, waxaana ay ku waayeen dhaqaale badan sida ay sheegeen.

Amni darrida soo wajahday ayay sheegeen inay wakhti hore bilaabatay oo xarumaha kala duwan ee shidaalka ay masuulka ka yihiin lagu dhacay.

Mid kamid ah ganacsatada oo ka hadlayay goobta ay ku shaacinayeen shaqo joojinta ay sameeyeen ayaa u sheegay shacabka reer Wajeer in sababta shaqo joojintooda ay tahay oo kaliya cabashada ay qabaan ee amni darada oo aysan dhib kale jirin, waxaana uu intaa raaciyay dhibaatada iyaga haysata ay sidoo kale saameyn karto ganacsiyada kale ee magaalada. Inta xal ay ka helayaan ayuu sheegay inuu sii xirnaan doono ganacsigooda. "Dhibaatada waxaa nagu haya rag xiran dareeska ciidanka" ayuu yiri.

Ganacsade kale oo sheegay in xaruntiisa qof lagu garaacay ayaa tilmaamay in dhallinyarada shaqaalaha ka ah ay soo wajahday cabsi, gaar ahaan kuwa shaqeeya xiliyada habeenkii oo ah xilli inta badan falalka dhaca la sameeyo.

Maxaa hadda cusub

Tan iyo intii ay xireen xarumaha shidaalka, waxaa mas'uuliyiinta xarumahaasi ay la kulmeen madaxda ugu sarreysa ismaamulka, waxaana shirar dhacay gelinkii dambe ee Khamiista ka soo baxay in la isku waafaqo dib u furitaanka xarumaha, "ayadoo ammaankoodana la damaanad qaadayo".

Mid kamid ah ganacsatada shidaalka ayaa BBC u xaqiijiyay in kulamada ay la qaateen masuuliyiinta maamulka Wajeer ee uu ugu sarreeyo barasaabka ismaamulka, ayna goob joog ahaayeen taliyaasha amaanka ismaamulka ee dowlada dhexe ee Kenya.

Shirka waxaa ka soo baxay barasaabka oo ballan qaaday gaadiid roondo ku sameeya magaalada xilliga habeenkii, iyaguna dhankooda ganacsatadu ay furaan xarumaha shidaalka isla habeennimadii.

Cabashadooda ay gudbiyeen ayaa maamulku u sheegay inuu wax ka qabanayo, lana sugayo ammaankooda xilliga habeenkii oo inta badana ay dhacaan falalka dhicitaanka ee loo gaysanayo xarumaha shidaalka.

Maxay ka yiraahdeen gaadiidleyda

Bishaar Axmed gudoomiyaha urur ay ku midaysan yihiin gaadiidleyda tagaasida ee magaala Wajeer, wuxuuna isaguna dhankiisa ka hadlay cabashada oo iyagana saameyn ku yeelan karta.

''Walaal cabashadeena waxa ay tahay dhanka shidaalka, Wajeer waxaa ku yaala ilaa 20 xarumo shidaal, waxa ay go'aansadeen inay albaabada u laabaan iyaga oo cabasho ah" ayuu yiri.

Asbuucyadii aan soo dhaafnay waxaa jiray dhib la xiriira dadka oo dhac iyo dilba loo gaysanayo. Lama xaqiijin dadkaas cidda soo dirtay iyo waxa ay ahaayeen, laakinse dadka deegaanka waxay BBC u shegeen inay ahaayeen rag dil iyo dhac gaysanayey.

Bishaar ayaa xusay cabashada ay qabaan dadka xarumaha shidaalka ay tahay mid saameyn karta dadka oo dhan.

Waxaa kale oo uu tilmaamay dadku inay talaabo ka qaadeen qaar kamid ah kuwa dhaca looga shakisan yahay.

''Waxaa dhacday dadaal badan oo la sameeyay, nimankii iyaga oo darees wata ayay shidaal dhaceen, shicibkii dadaal ayay sameeyeen waa la cayrsaday oo labo ka mid ah baa la qabtay'' ayuu yiri Bishaar.

Mushkiladdan shidaalka ayaa saamayn ku yeelatay isku socodka gaadiidka, taasoo keentay inay gaadiidka dadweynuhu shaqooyinka joojiyaan.

Laamaha amniga iyo maamulka Wajeer oo aan la xiriirnay si aan wax uga weydiinno cabashadan ayeysan noo suurtogelin in aan helno.