Jilayaasha Yuusuf Cabdillaahi Muuse (Yuusuf Ceegaag) iyo Cabdiqani Maxamed Cabdillaahi (Iskufilan), oo aad caan uga ah gudaha Somaliland iyo geyiga Soomaalida, ayaa ku dhawaaqay in ay siyaasadda ku biirayaan.

Ceegaag iyo Iskufilan, oo ah laba jilaa oo saaxiib ah isla markaana caan ku ah in ay Ramadaan kasta isla keenaan filimo taxane ah oo qoysaska loogu talo-galay, ayaa ku dhawaaqay in ay u tartamayaan doorashada Golaha Wakiillada Somaliland ee 2026-ka.

Ceegaag, oo waraysi siiyay Warbaahinta Galaydh, ayaa ballanqaaday in uu xoolaha ummadda ilaalin doono haddii la doorto, isaga oo ula jeeda in uu ka hortagi doono musuqmaasuqa.

Waxaanu yidhi. "Xoolaha ummadda waan u ilaalin doonaa haddii lay doorto, haddii ILLAAHEY yidhaahdo doorashada golaha wakiillada ee 2026-ka”

Jilaa Isku-filan, oo isaguna musharraxnimadiisa kaga dhawaaqay deegaanka Laasgeel ee gobolka Saaxil, ayaa dadka deegaanka ka codsaday in ay codkooda la barbar istaagaan.

Waxaanu yidhi.”Waxaan doonayaa in codsigaygaa aad iga aqbashaan, Laasgeel-na ay lasoo baxdo xildhibaan gole wakiillo iyo gole deegaan, Codkeenna awal waa la raran jiray, maanta halkan aynu ku adkaysano,”

Jilayaashan ayaa ku dhiiraday in ay ku biiraan siyaasadda kadib markii Xildhibaan Abwaan Xasan Saleeebaan Dhuxul ‘Laabsaalax’, oo hore usoo noqday guddoomiyaha kooxda faneedka Xidigaha Geeska, sidoo kalena ah abwaan curinta heesaha iyo gabayada caan ku ah, uu ku guulaystay in uu kusoo baxo doorashadii Golaha Wakiillada ee 2021.

Labadan jilaa ayaa ka soo muuqday shirkad la yidhaa Sollywood, oo soo saarta filimada, iyaga oo taxane la magacbaxay Damac ka mid ahaa Jilayaasha doorka muuqda ku leh, oo si weyn loo jeclaaday, isla keenay Ramadaantii sannadkan, taxanahan ayaa kumanaan daawasho ah ka helay baraha internetka.