Guddoomiyaha gobolka Sellel, Mudane Cabdi Siciid Faahiye, ayaa ka hadlay Badda oo ku fatahday gudaha magaalada Saylac iyo degaanka Toqoshi ee Milixda laga soo qodo taasoo keentay khasaare hantiyadeed.

Sidoo kale fatahaadan Badda ayaa saameysay dhawr xaafadood, iyadoo biyuhu ay galeen guryaha iyo goobaha ganacsiga.

Guddoomiyaha gobolka Sellel oo la hadlay warbaahinta Qaranka JSL, ayaa sheegay in fatahaadani ay tahay wax dhaca sannadkii hal mar, waxaanu xusay in fatahaada gudaha magaalada Saylac ay sabab u tahay kadidb markii duugoobeen moosaskii biyaha ka celinayay magaalada, waxaanu hoosta ka xariiqay inay hadda ka hawlgalayaan sidii dib u cusbooneysiin loogu sameynlahaa.

Geesta kale waxa uu sheegay in degaanka Toqoshi ee Milixda laga soo qodo ilaa 300 Ceel ay waxyeelo ka soo gaadhay fatahadda biyaha Baddu.

Waxaanu yidhi." Guud ahaan gobolku waa nabadgelyo, gaar ahaan degmada Saylac sidaa aad sheegayso Badii xalay waxay ahayd middigii, middiga la sheegayaana sanadkiiba mar buu yimaadaa, dhawr biloodna wuu soo noq-noqdaa baa la yidhi, dadka badd mareenada ahi sida ay sheegayaan iyo reer Saylacba.

Sanadkiiba mar buu yimaadaa, markii uu ugu xooga badnaa bay ahayd intii dadka reer Saylac inta waawayn ay noolaayeen markii uu ugu biyaha badnaa bay ahayd baa la yidhi, sidan oo kale wali ma noqon, Berbera iyo Toqoshi, Lawyacaddo qudheeda wuu soo yara gaadhay.

Wax khasaare ah waxa jira Ceelashaas Toqoshi baa jira oo ilaa 300 oo Ceel wax ku dhaw dadkii biyihii ka xidheen oo tacabkii wax yeelo ku soo gaadhay, Ceelashii ka aasmeen oo baddii gashay, intaasi mooyee Saylac afar meelood oo moosaskii baaliga noqday ayay soo jabsatay oo u baahan in dib loo dhiso oo isku wareeg ah, markaa goobo ayaa loo xidhaa, waanu soo kormeernay magaaladu way nabad qabtaa, wax ku dhintay ma jirto, wax khasaare ah ma jiraan iyo cid ku barakacday, haddii laga tegi waayo xaafadihii ay biyuhu galeen ayaa Raashinkii ka qoyay intaana gurmad baanu ka galnay, waxaanu iska kaashanay dawladda hoose iyo dawladda dhexe wixii gar-gaar loo helay dadka waanu u ballan qaadnay.

Markaa waanu ka gurmanaynaa oo waxa aanu wasaaradda gaadiidka iyo Hay’adda wadooyinka uga baahan nahay gaadiid wax lagaga qabto, sidoo kale waxa loo baahan yahay in laga gurmado biyaha roobabka oo Dooxyadda waawayn ee Saylac ku dusha ka mar iyo Dooxa Toqoshi ayaa markii hore waxa ay ka soo Jabeen dusha sare waxaa loo baahan yahay in iyagana gurmada laga galo.

Dawladayada gurmad baanu ka sugaynaa, inta aan biyaha badda iyo Roobabka gu’gu isku darsamin, waxaan loo baahan yahay in Iska rogooyin la geliyo oo la xidho”