Hoggaamiyaha aqalka Sanatka ee tiro badan yahay dalka Mareykanka Chuck Schumer ayaa ku baaqay in baaritaanno lagu sameeyo barnaamijka cusub ee dhawaan soo baxay ee FaceApp kaas oo sawirrada lagu dhalan rogayo, qofkana uu sawirkiisa ka dhigi karo hadba da'da uu doono in uu isu ekeeysiiyo.

Warqad uu soo geliyay barta Twitter-ka ayaa waxaa uu Schumer ku tilmaamay barnaamijka FaceApp "Mid dhibaato badan leh” oo horseedi karo in xogta muwaadhiniinta Mareykanka uu gacanta u geliyo dal shisheeye oo cadaw ah.

Waxaa walaac laga muujiyay in laisku haleyn karo shirkadda Ruushka laga leeyahay ee soo saartay FaceApp kaddib markii dhawaan dunida uu si weyn ugu baahay.

Balse shirkaadda FaceApp waxay beenisay eedeymaha loo jeediyay.

"Inkasta oo kooxda daraasaadka iyo baaritaanada shirkadda uu fadhigeedu yahay Ruushka balse xogta dadka isticmaala FaceApp looma gudbiyo Ruushka” ayaa lagu yiri bayaan kasoo baxay FaceApp, bayaankaas waxaa tebisay warbaahinta TechCrunch.

Senetar Schumer ayaa waxaa uu ka codsaday laanta dambi baarista Mareykanka ee FBI-da iyo guddiga ganacsiga Federaalka inay baaritaanno ku sameeyaan baarnaamijka FaceApp.

"Waxaan walaac xooggan ka muujinayaa sida loo xaqiijin karo badqabka xogta dadka isticmaalaya barnaamijka”

Shirkadda waxay sheegtay in 80 milyan oo qof ay adeegsadaan barnaamijka FaceApp.