Ducaddii Ayeyday.
Alle ha u naxariisto Ayeeyo Qadiija Faadumo Cirku-Jarran, waxa ay ahayd ruux Duco badan oo baryada ama Tuugsiga Alle carabka ku hayn jirtay Goor iyo habeen, waxa se xusuus aan suulahayn igu reebtay subaxii jarmaadkii iskuulka, dabshidka aanu kici jirnay, ayaa marka dabka lashido Girgire iyada u gaar ahaa ayaa dabka ugu horeeya loogu ridi jiray, ayey foox inta ay dabka ku rido ayey odhan jirtay:-.
Barako Alley soo deg, Shaydaanow Huf oo habow!.
Ballaayada -
Ta Hore Roorran
Ta Danbe Reeban
Ta Hareeruhu Riixan
Ta Samadu Raarran
Ta Hoose Radeeban.
Mowlow Allahayow na Dhowr
Adigaanu Magan iyo
Kuu nahay Marti
Allow Allahayow.
Waa Duco aan yaraantii maqalkeeda qabantimay oo Runtii xusuus igu dihin ah se macnaha ducadu wuxuu igu duxay waa’ danbe, u malayn maayo Duco ama Tuugmo Alle la Tuugo ee Alle la Magan galo ee Marti qaadka Alle Dalbada maxay kale?.
Waa Duco ah Habar ka soo gaadh oo qiimo badan oo Kooban waxna ka tegin, Allow Ayeeyo Qadiija iyo Hooyoleydii hoyatay iyo intii Allahayow Ummaddaada adigaa naga oge intii naxariistaada u fidisay iyo intii Muslin ah u naxariiso Aamiin yaa Alle Aamiin.
Allow Allahayow
Adigaanu Magan iyo
Allow kuu nahay Marti.
Khadar Hooyoley
AFEEF:
Hadhwanaagnews marnaba masuul kama aha Aragtida dadka kale. Qoraaga ayaa xumaanteeda, xushmadeeda iyo xilkeeda sida. waxa kaliya oo Hadhwanaagmedia dhiirigalinaysaa, isdhaafsiga aragtida, canaanta gacaliyo talo wadaagga!