Halkay Ku Danbeeyeen Calooshooda U Shaqaystayaashii Wagner Ee Sanad Ka Hor Kacdoonka Ka Samaysay Ruushka?
Ruushka ayaa burburiyay oo bedelay kooxda Wagner tan iyo sanadkii hore markii calooshood u shaqeystayaasha ay ka yaabiyeen adduunka, dhanka kalana ay bilaabeen kacdoon ka dhan ah dowladda Madaxweyne Vladimir Putin, khubarada ayaa sidaas u sheegay BBC.
Yevgeny Prigozhin - hogaamiyihii hore ee ciidamada militariga - ayaa ka soo gudbay Ukraine 23-kii Juun 2023 wuxuuna qabsaday koonfurta magaalada Rostov ka dib bilo ay sii kordheysay xiisadda kala dhaxeysa hogaamiyayaasha militariga ee Moscow.
Ciidamadiisa ayaa markaas bilaabay dhaqdhaqaaq kooban oo ku wajahan caasimadda, iyagoo aan la kulmin wax iska caabin ah. "kadoonka cadaaladda", sida Prigozhin uu ugu yeeray, ayaa si lama filaan ah u soo dhamaaday maalintii xigtay ka dib markii uu joojiyay Prigozhin.
Kaliya laba bilood ka dib markii sidaasi dhacday, diyaaradda Prigozhin ayaa burburtay waxaana lagu dilay isaga iyo dhowr xubnood oo kale oo sare oo Wagner ah, taasoo mustaqbalka kooxda ku ridday hubanti la'aan.
Dr Sorcha MacLeod, oo xubin ka ah kooxda shaqada ee Qaramada Midoobay u qaabilsan calooshood u shaqeystayaal iyo macallin wax ka dhiga Jaamacadda Copenhagen, ayaa sheegtay in ciidamadii hore ee Wagner ay ku kala baheen guud ahaan dalka Ruushka.
Kooxda "[Wagner] waxa laga yaabaa in aanu u jirin qaabkii ay hore u ahaan jirtay, laakiin nooc - ama xitaa noocyo la mid ah oo sidooda u shaqeeya - ayaa sii jiraya," ayay u sheegtay BBC.
"Kooxda Wagner waxay Ruushka u ahayd koox aad muhiim ugu ah marka la eego juquraafi ahaan iyo dhaqaale ahaanba, sidaa darteed waligood si toos ah meesha ugama saarayaan sida dadka qaarkiis soo jeediyeen," ayay raacisay.
Muddo sanado ah, ciidamada Prigozhin waxay ahaayeen hanti qiimo leh oo aan la dafiri karin gaar ahaan hawlgallada Ruushka ee Afrika iyo Suuriya.
Dhammaadkii 2022 iyo horraantii 2023, Wagner wuxuu fure u ahaa guulihii goobta dagaalka ee Ruushka iyo Ukraine.
Ciidamadeeda - oo u badan maxaabiis hore – waxaa u suurtagashay in ay qabsadaan bariga magaalada Soledar, ka hor intaysan qeyb ka noqon dagaal ba'an oo ka socday Bakhmut.
Markii ugu sarreysay Wagner waxay dagaalka Ukraine ku lahayd ku dhawaad 50,000 calooshood u shaqeystayaal ah, sida uu sheegay Golaha Amniga Qaranka Mareykanka.
Hadda, khubarada ayaa sheegaya in hawlgallada Wagner ee Ukraine ay hoos u dhigeen cutubyo kale oo Ruush ah iyo kuwa militari. Mid ka mid ah taliyihii hore ee Wagner ayaa dhawaan BBC Ruush u sheegay in calooshood u shaqeystayaasha lagu amray inay "ku biiraan wasaaradda gaashaandhigga" ama ay iska baxaan.
Saraakiisha sirdoonka UK ayaa soo jeediyay in qaar ka mid ah cutubyada lugta ee kooxda la hoos geeyay Rosgvardia, ama Ilaalada Qaranka. Unugga, oo la aasaasay 2016, ayaa lagu tilmaamay inay yihiin "ciidanka gaarka ah" ee Mr Putin, waxaana gacanta ku haya Viktor Zolotov oo ahaa ilaaliyhii gaarka ee Putin.
Wasaaradda Difaaca ee UK (MoD) ayaa sheegtay in xubno ka tirsan kooxda Wagner ay bilaabeen inay hoos yimaadaan ilaalada Qaranka bishii Oktoobar 2023.
Anton Yelizarov – oo muddo dheer ka shaqaynayey Wagner oo la sheegay inuu amray calooshood-u-shaqaystayaashii hawlgallada dhiigga badan ku daatay ee Bakhmut – ayaa maalmo ka dib u muuqday mid xaqiijinaya is-dhexgalka.
Muuqaal la soo dhigay barta Telegram-ka ee Wagner, wuxuu ku sheegay inuu goobjoog ka ahaa dhismaha xero ay ciidamada Wagner "ka hawl-geli doonaan iyagoo ka shaqeynaya danaha Ruushka" oo ay qaab cusub ugu biirayaan cutubyada Ilaalada Qaranka.
Sirdoonka Boqortooyada Ingiriiska (UK) waxay yiraahdeen "isku darka kooxdii hore ee Wagner iyo Rosgvardia's Volunteer Corps waxay aad ugu badan tahay inay muujisay in Wagner si guul leh loogu soo gacan geliyey Rosgvardia, taasoo kordhinaysa xukunka dawladda Ruushka ee kooxda Wagner".
Xoogagii kale ee Wagner ayaa saxeexay inay ka barbar dagaallamaan ninka awoodda badan ee dhow Vladimir Putin ee Chechnya xukuma- Ramzan Kadyrov - iyo ciidamadiisa Akhmat, baaritaan ay dhowaan BBC-da Ruushku samaysay ayaa sidaas lagu ogaaday.
Tusaalaha la taaban karo ee hoos u dhaca kooxda ayaa yimid markii la sheegay in astaantooda laga saaray daarihii ay ku qabsadeen magaalada labaad ee Ruushka ee St Petersburg.
Maalmihii ka dambeeyay afgambigii dhicisoobay, Prigozhin ayaa la sheegay in uu meesha ka saaray heshiis uu la galay Putin si uu diiradda u saaro howlgallada kooxdiisa ee Afrika, soo bandhigidda maamullada iyo u sugidda kheyraadka Ruushka.
Ka dib dhimashadii Prigozhin, ku xigeenka wasiirka difaaca Yunus-Bek Yevkurov ayaa lagu soo waramayaa inuu booqday caasimadaha Afrika, isagoo u xaqiijiyay saraakiisha in adeegyada ay bixiyaan kooxdu aysan baabi'in doonin.
![]() |
![]() |