Saddexda xisbi qaran ee WADDANI, UCID iyo KULMIYE iyagoo middaysan oo jiritaanka Somaliland meel uga soo wada jeedda waxa ay maanta si mug iyo miisaan leh u soo dhaweeyeen Safarkii uu Madaxweynaha Somaliland Md. Muuse Biixi Cabdi uu kaga soo laabtay dalka ku yaalla galbeedka Africa ee guinnea Conakry, kadib markii uu ka helay martiqaad rasmiya,

waxaannay talaabadani ahayd mid aan hore loo arag mudadii uu talada dalka hoggaaminaayay Madaxweyne Muuse Biixi Cabdi, hase yeeshee tani waxa ay ahayd mid ka dhalatay hadal weerar ah oo dawladda taagta daran ee Somalia ay kaga jawaabtay safarkii Madaxweynaha Somaliland ee dalka guinnea Conakry.

Waa talaabo wanaagsan oo loo baahnaa inay hoggaamiyeyaasha Somaliland

Mucaarid iyo Muxaafid-ba maanka ku hayaan Dannaha guud iyo Maslaxadda

ummadda Somaliland inay kolkasta meel uga soo wada jeeddaan oo wax walba ay ka horraysiiyaan guulaha iyo horu-socodka Jamhuuriyadda

Somaliland, waxaannay talaabadani meesha ka saarraysaa kala qaybsannaanta ummadda Somaliland. Ha-yeeshee su’aasha iswaydiinta mudani waxay tahay haddii Safarkii Madaxweynaha ee dalka guinea Conakry uu noqday guul qaranku wada leeyahay oo la harreero joogsadday Madaxweynaha Somaliland, maxaa ku jabban in sidaa si la mida Xisbiyadda iyo Xukuumadda uu hoggaamiyo Madaxweyne Biixi ay guul qaran u arkaan iyagoo ka duullaaya dannaha qaranka inay isku soo dhawaaddaan oo isu tanaasullaan Qoddobada ay isku mari la’a yihiin ee Komishanka doorashooyinka oo labada mawqif oo kala durugsan ay kala taagan yihiin Xisbiga mucaaridka ah ee WADDANI iyo Xisbiga talada haya ee KULMIYE iyo Xukuumadda oo isku dhinac ah.

Si kastaba ha ahaatee waxa habboon in midnimaddii ay maalintii shalay muujiyeen Xisbiyadda siyaasadda Somaliland, iyagoo dhinacyadda ka taagan Madaxweynaha jamhuuriyadda Somaliland inay arrimaha horyaalla ee Koomishanka doorashooyinkana si middaysan oo wada-jir ah u wada fadhiistaan, isla markaanna iyagoo eeggaaya danaha iyo horumarka qaranka inay isu tanaasullaan oo darreen kasta oo jira iyo isku muuqasho kasta intay dhulka dhigaan ay ka horraysiiyaan himillooyinka uu qarankani hiigsannaayo, isla markaanna hirgeliyaan dimuqraadiyaddii lagu majeeran jirey Soomaalilaand.

Hadhwanaagnews/Office

Hargeisa,Somaliland